नेपाःयात यू-१९ मिसा क्रिकेटया उपाधि
नेपालं स्वक्वःगु खुसी नं यू-१९ मिसा क्रिकेटया उपाधि त्यकाः ह्याट्रिक यायेत ताः लाःगु दु । शुक्रवाः जूगु फाइनल कासाय् थाइल्याण्डयात ६ विकेटं बुकाः नेपालं स्वक्वःगु खुसी थुगु उपाधिया कब्जा याःगु खः ।
कुवेतया युनिटी स्टेडियमय् जूगु फाइनल कासाय् थाइल्याण्डं न्हापांगु ब्याटिङ यानाः ७४ रन दयेकूगु खःसा नेपालं २१ ओभरय् प्यंगू विकेटया जक क्षतिइ निर्धारित लक्ष्य प्राप्त याःगु खः । न्हापांगु ब्याटिङ याःगु थाइल्याण्डं २३ दशमलव ४ ओभरय् पुक्कं विकेटया क्षतिइ ७४ रन दयेकूगु खः ।
७५ रनया लक्ष्य सहित ब्याटिङय् वःगु नेपालं ० रनय् हे निगू विकेट तंकूगु खः । तसकं खराब शुरुवात याःगु नेपाःया निंतिं रुविना क्षेत्री व ममता चौधरीं संयमित ब्याटिङ यासें ५६ रनया पार्टनरशिप दयेकूगु खः । नेपाःया निंतिं कप्टान रुविना क्षेत्रीं सार्वाधिक २४ रन दयेकूगु खःसा ममतां २१ रन दयेकूगु खः ।
अलराउण्ड प्रदर्शन याम्ह कप्टान रुविनां थाइल्याण्डया स्वंगू विकेट नं काःगु खः । रुविना फाइनल कासाया प्लेयर अफ दि म्याच व धेंधेंबल्लाया प्लेयर अफ दि टुर्नामेन्ट नं घोषित जूगु दु ।
