नेपाः एसीसी यु-१९ मिसा क्रिकेटया फाइनलय्
एसीसी यु-१९ मिसा च्याम्पियनसिप अन्तर्गत बिहीवाः जूगु सेमिफाइनलया कासा त्याकाः नेपाः फाइनलय् दुहावंगु दु । सेमिफाइनलय् भुटानयात स्वंगू विकेटं बुकाः नेपालं थःगु फाइनलया यात्रा क्वःछिउगु खः ।
कासाय् भुटानं न्हापांगु ब्याटिङ यानाः निर्धारित २५ ओभरय् ७ विकेट तंकाः ९६ रन दयेकूगु खः । भुटानया निंतिं डेचेन वाङमों ४८ व यसी वाङमों २६ रन दयेकूगु खः । ९७ रनया लक्ष्य सहित मैदानय् कुहांवःगु नेपालं खराब शुरुवात यात ।
न्हापांगु ओभरय् निगू विकेट तंकूगु नेपालं लिप्पांगु ओभरया निगू बल दनीवं थःगु निर्धारित लक्ष्य प्राप्त याःगु खः । नेपाःया निंतिं अनुराधा चौधरीं सर्वाधिक २५ रन दयेकूगु खःसा चौधरी व सोनु खड्काया ३१ रनया साझेदारीं नेपालं फाइनलया यात्रा तय याःगु खः ।
आः नेपालं उपाधिया निंतिं फाइनलय् थाइल्याण्ड नाप धेंधेंबल्ला याइ । मेगू सेमिफाइनलय् थाइल्याण्डं कुवेतयात बुकूगु खः ।
