जनसत्ता सम्बन्धी निर्णय लितकायेवं प्रमया राजीनामा माग
सरकारं माओवादी जनसत्ता सम्बन्धी निर्णय लितकायेवं मोहन वैद्य 'किरण' पक्षधरं प्रधानमन्त्री डा. बाबुराम भट्टराईया राजीनामा फ्वंगु दु ।
मन्त्रिपरिषद्या बिहीवाः च्वंगु मुँज्यां जनसत्ता सम्बन्धी निर्णय लितकायेवं च्वंगु माओवादी स्थायी समिति मुँज्याय् वैद्य पक्षं प्रधानमन्त्रीया राजीनामा माग याःगु खः । छुं ईया निंतिं मिलेजूगु माओवादी दुनेया विवाद सरकारया थुगु निर्णय लिपा हानं ब्वलंगु दु ।
माओवादी नायः पुष्पकमल दाहाल 'प्रचण्ड'या लाजिम्पाटस्थित छेँय् च्वंगु स्थायी समितिया मुँज्याय् विवाद ब्वलनेवं छुं ई जक च्वनाः स्थगित याःगु खः । वैद्य पक्षधरतय्सं सरकारं जमिन्दारतय् न्ह्यःने आत्मसम्पर्ण याःगु धासें प्रधानमन्त्री भट्टराईया राजीनामा फ्वंगु खः ।
थ्वस्वयां न्ह्यः बुधवाः गोकर्ण रिसोर्ट च्वंगु स्वंगू प्रमुख दलया मुँज्याय् जूगु सहमति कथं बिहीवाः च्वंगु मन्त्रिपरिषद्या मुँज्यां जनसत्ता सम्बन्धी निर्णय लितकाःगु खः ।
