सरकारं जनसत्ता सम्बन्धी निणर्य लितकाल
विपक्षी दलतय् तच्वःगु विरोध लिपा सरकारं थःम्हं हे याःगु जनसत्ताया निर्णय कार्यान्वयन यायेगु निर्णय लितकाःगु दु । सरकारं तप्यंक जनसत्ता सम्बन्धी निर्णय लितकायेगु धकाः मधाःसां उगु निर्णय तत्काल कार्यान्वयन मजुइगु व कायम नं मजुइगु निर्णय याःगु दु ।
बिहीवाः सुथय् सिंहदरवारय् च्वंगु मन्त्रीपरिषद्या मुँज्यां सरकारं थःम्हं हे याःगु निर्णय लितकासाः मखूगु सन्देश वनीगु धासें चाहिकाः जनसत्ता सम्बन्धी निर्णय लितकाःगु खः । बुधवाः च्वंगु स्वंगू प्रमुख दलया शीर्ष नेतातय् मुँज्याय् सरकारं न्ह्यागू भाषा छ्यलाजूसां जनसत्ता सम्बन्धी निर्णय लितकायेगु सहमति जूगु खः ।
थ्वस्वयां न्ह्यः सरकारं जनसत्ता सम्बन्धी निर्णय कार्यान्वयन यायेगु निर्णय लिपा सवोच्च अदालतं तत्काल उगु निर्णय कार्यान्वयन मयायेत निर्देशन बिउगु खः । अथेहे प्रमुख विपक्षी दलतय्सं उगु निर्णय विरुद्ध छुं ई न्ह्यः निसें संसद अवरुद्ध यानावयाच्वंगु खः ।
सरकारं जनसत्ता सम्बन्धी निर्णय लितकायेधुंकाः आः उकीया बारे वैकल्पिक व्यवस्था यायेगु निंतिं विपक्षी दलतनाप न्हय्न्हुया दुने सहलह यायेगु निर्णय नं याःगु दु ।
