प्रमुख स्वंगू दलया मुँज्या सकारात्मक
प्रमुख स्वंगू दलत दथुइ बुधवाः गोकर्ण रिसोर्टय् च्वंगु शीर्ष नेतातय् मुँज्या सकारात्मक जूगु खँ नेतातय्सं धाःगु दु ।
मुँज्याय् प्रधानमन्त्री डा. बाबुराम भट्टराईं जनसत्ताया निर्णय लितकायेगु खँय् लचकता क्यंगुलिं मुँज्या सकारात्मक जूगु टिप्पणी नेतातय्सं याःगु दु । मुँज्या लिपा विपक्षी नेतात रामचन्द्र पौडेल व माधवकुमार नेपालं वार्ता तसकं सकारात्मक जूगुलिं उपयुक्त निकास पिहांवइगु दावी यानादिल ।
प्रधानमन्त्री भट्टराईं जनसत्ताया निर्णय मन्त्रिपरिषद्या मुँज्या च्वना लितकायेगु व बिहीवाःया संसदया मुँज्याय् सम्बोधन यायेगु प्रतिवद्धता प्वंकादीगु खः । विपक्षी कांग्रेस, एमाले लगायतया दलतय्सं जनसत्ताया निर्णय लितकायेमाःगु अडान तयाः छुं ई न्ह्यःनिसें संसद् अवरुद्ध यानावयाच्वंगु खः ।
अथेहे मुँज्याय् स्वच्छिक अवकाश काइपिं लडाकुतय् चेक लाकाकाःगु नापंया बारे सहलह यायेत सेना समायोजन विशेष समितिया मुँज्या सःतेत नं प्रधानमन्त्रीं तयार जुयादीगु दु ।
