‘न्हय्न्हुया दुने अविश्वासया प्रस्ताव’
नेपाली कांग्रेसं न्हय्न्हुया दुने सरकारं सहमति कार्यान्वयन यानाः सेना समायोजन प्रक्रिया न्ह्यःने मयंकूसाः सरकार विरुद्ध अविश्वासया प्रस्ताव हइगु खँ धाःगु दु ।
रिपाटर्स क्लबं सोमवाः येँय् याःगु छगू साक्षात्कार ज्याझ्वलय् कांग्रेस केन्द्रीय दुजः डा. रामशरण महतं सहमति कथं ज्या मजूसाः छवाःया दुने अविश्वासया प्रस्ताव हयेगु व माओवादीनापया संवाद बहिष्कार यायेगु ख्याच्वः बियादिल ।
सरकारं न्हय्न्हुया दुने नं सहमति कार्यान्वयन मयासाः विपक्षी दलत कांग्रेस व एमालें मंकाः कथं माओवादीयात बाध्य यायेत तसकं गम्भीर पलाः ल्ह्वनेत नं तयार जूगु धयादिल । वय्कलं माओवादीं सहमति पालना याःसा थ्वहे सरकारयात ग्वाहालि यायेत नं थःपिं तयार दुगु धयादिल ।
एमाले नेता भीम रावलं माओवादीं शान्ति प्रक्रिया स्यंकाः जनविद्रोहलय् वनेगु तयारी यानाच्वंगु द्वपं बियादिल । सहमति कार्यान्वयन मयासें पदय् च्वनाच्वनेगु प्रधानमन्त्रीं बिचाः मयासां जिउगु धयादिसें वय्कलं न्हय्न्हु दुने सहमति पालना मजूसाः सरकार क्वःथलेगु ख्याच्वः बियादिल ।
अथेहे साक्षात्कारय् माओवादी नेता नापं प्रधानमन्त्रीया राजनीतिक सल्लाहकार देवेन्द्र पौडेलं प्रधानमन्त्रीं छुं नं हालतं आः राजीनामा मयाइगु धयादिल । माओवादीया नेतृत्वया सरकारं शान्ति प्रक्रिया न्ह्याकूसां जटिलता वयाच्वंगु धयादिसें पौडेलं मेगू दलया नेतृत्व लाः शान्ति प्रक्रियां छुं नं प्रगति यायेमफइगु दावी यानादिल ।
