छवाः लिपा कांग्रेस-एमालें गम्भीर पला: ल्ह्वनीगु
विपक्षी दलत नेपाली कांग्रेस व नेकपा (एमालें) सरकारयात न्हय्गू बुँदे सहमति कथं शान्ति प्रक्रिया न्ह्याकेत छवाःया अल्टिमेटम बिउगु दु । निगू दलं यदि सरकारं उगु सहमति कथं ज्या मयासाः छवाः लिपा थःपिंसं गम्भीर पलाः ल्ह्वनेगु ख्याच्वः बिउगु दु ।
एमालेया मू ज्याकू बल्खुइ सोमवाः च्वंगु निगू दलया मुँज्यां सरकार व माओवादी सहमति अःख न्ह्याः वंगु द्वपं बिउगु खः । निगू दलया मुँज्या लिपा एमाले नायः झलनाथ खनाल व कांग्रेस संसदीय दलया नेता रामचन्द्र पौडेलं छगू मंकाः विज्ञप्ति पिथना नेपाः व नेपाःमितय् माग व भवनाया उपेक्षा जूसाः गम्भीर पलाः ल्ह्वनेत थःपिं बाध्य जुइगु खँ न्ह्यथंगु दु ।
निगू दलं माओवादीं संविधानसभाया विवाद समाधान उपसमितिइ जुइधुंकूगु सहमतियात हानं हिकेगु कुतः यानाच्वंगु नापं लडाकू समायोजन बारे जूगु सहमति अःख थप लडाकूतय्त प्याकेज बिइगु तयारी यानाच्वंगु द्वपं बिउगु दु । सरकार व माओवादीया अज्याःगु तयारी थःपिंत मान्य मजुइगु खँ नं विज्ञप्तिइ न्ह्यथनातःगु दु ।
