थनिंनिसें लडाकूतय् बिदाइ प्रक्रिया न्ह्यात
तःदँनिसें अस्थायी शिविरय् दुपिं मध्ये स्वेच्छिक अवकाश ल्यःपिं माओवादी जनसेनाया बिदाइ प्रक्रिया थनिंनिसें न्ह्याःगु दु । बिदाइया फुक्क प्रक्रिया पूवंकाः थनिंनिसें उमित छेँय् छ्वयेगु ज्या न्ह्याकूगु दु । स्वंगूगु डिभिजनया सहायक कमाण्डर उदयबहादुर चलाउनेपाखें चेक वितरण ज्या न्ह्याःगु खः । अथेहे लडाकूत गणेश बहादुर श्रेष्ठ, गोकुल बजागाईं, दिल्लीप्रसाद डोटेल व नबिन जिरेलं शुरुइ चेक काःगु खः । चलाउनें प्यंगू लख, श्रेष्ठ, बजगाईं व डोटेलं निगूत्या लख व जिरेलं स्वंगू लखया चेक काःगु टोलीइ ब्वति दुम्ह छम्ह दुजलं जानकारी बियादिल । थ्व निगू किस्ता मध्येया बच्छि धेबा खः । ल्यंदनीगु धेबा मेगु किस्ताय् बिइगु जूगु दु ।
थ्व स्वयाः न्ह्यः चेक कायेबलय् जायेकेमाःगु फारामय् अनमिनं न्ह्यःथनातःगु तह न्ह्यःथनेगु वा लडाकुया आन्तरिक तह न्ह्यःथनेगु धइगुलिइ विवाद उत्पन्न जुइधुंकाः चेक हस्तान्तरण प्रक्रिया हे अबरुद्ध जूगु खः । अनमिनं प्रमाणीकरण यायेबलय् छगू तह न्ह्यःथंगु दुसा माओवादीया आन्तरिक अभिलेखय् उमिगु तह मेगु हे न्ह्यःथंगु दु । लडाकुतय्सं अनमिनं न्ह्यःथंगु तहयात मान्यता मब्यूसे आन्तरिक तहयात मान्यता बीमाःगु माग तयेवं चेक वितरण प्रक्रिया पंगः जूगु खः ।
स्वेच्छिक अवकाश ल्यःपिं माओवादी जनसेनातय्त चेक वितरणया झ्वलय् चेक कायेबलय् जायेकेमाःगु फारमय् अनमिनं न्ह्यःथंगु तह न्ह्यःथनेगु वा जनसेनाया आन्तरिक तह न्ह्यःथनेगु धइगुलिइ विवाद पिज्वःगु खः । सेना समायोजन बिशेष समिति सचिवालयया कथं पुनःप्रमाणीकरणया इलय् ब्यूगु म्हसीका पौया आधारय् स्वेच्छिक अबकाश ल्यःपिं जनसेनातय्त तह कथंया न्हापांगु किस्ता बापतया धेबा बियाः बिदाई प्रक्रिया न्ह्याकूगु खः ।
