आयोगया प्रतिवेदन : फरक मत वा फरक प्रतिवेदन?
न्हूगु नेपाःया राज्य र्संरचनाया सुझाव बिइत सरकारं नीस्वंगु राज्य पुनर्संरचना उच्चस्तरीय आयोगं मंगलवाः थःगु प्रतिवेदन प्रधानमन्त्री डा. बाबुराम भट्टराईयात लःल्हात । बहुमत व अल्पमतया आधारय् थीथी सुझाव दुथ्याःगु प्रतिवेदन सरकारयात लःल्हायेवं उकीया बारे थीथी बुखँ सार्वजनिक नं जुल । उकी मध्ये छगू खः – आयोगं सरकारं निगू बिस्कं प्रतिवेदन लःल्हात ।
नेपाःया नांजागु थीथी पत्र पत्रिका नापं संचार माध्यमं निगू प्रतिवेदन सरकारयात लःल्हाःगु धकाः बुखँ बिल । तर धाथें अन निगू प्रतिवेदन लःल्हाःगु मखसें छगू जक प्रतिवेदन लःल्हाःगु खः । अल्पमत पक्षया फरक मत दुथ्यागु छगू हे प्रतिवेदन सरकारयात लःल्हाःगु दावी स्वयम अल्पमत पक्षया डा. रमेश ढुंगेलं न्ह्यःथनादीगु दु ।
आयोगया संयोजक डा. मदन परियारं प्रधानमन्त्रीयात प्रतिवेदन लःल्हायेधुंकाः फरक मतया छगू कपि बिस्कं खामय् तयाः प्रधानमन्त्रीयात लःल्हाःगु खः । वय्कलं थीथी संचार माध्यमनाप खँल्हाबंला यासें थःम्हं आयोगया मेपिं निम्ह दुजः सर्वराज खड्का व सावित्रि गुरुङ जना तःगु फरक मत हे सरकारयात 'रिफरेन्स' जुइमा धकाः बिस्कं लःल्हाःगु धयादीगु खः ।
आयोगया संयोजक सहित गुम्हं दुजःतय्सं ल्हाःचिं तयाः लःल्हाःगु छगू प्रतिवेदनयात थीथी संचार माध्यमं निगू प्रतिवेदन धकाः प्रचार यानाजूगु प्रति आयोगया दुजःतय्सं आपत्ति प्वंकूगु दु ।
आयोगं प्रतिवेदन लःल्हाये न्ह्यः हे संचार माध्यमतय्सं निगू प्रतिवेदन वइगु पक्का जुल धकाः बुखँ सार्वजनिक याःगु खः । तर अन्तिम इलय् छगू जक प्रतिवेदन वयेवं संचारमाध्यमतय् बुखँ गलत सावित जूगु खः । तर नं संचारमाध्यमतय्सं थःपिनिगु बुखँ हे पाय्छि धायेकेगु निंतिं व आयोगया प्रतिवेदनया विवादीत यायेत फरक मतयात मेगू हे प्रतिवेदन धकाः प्रचार याःगु सूत्रया दावी दु ।
