नेवाः प्रदेशं पिने च्वंपिं नेवाःतय्त अग्राधिकार
पिने च्वंपिं नेवाःतय्त अग्राधिकार नेपाःया आदिवासी जनजातितय्सं स्वायत्त प्रदेश अर्थात राज्य दुने थःपिनिगु अग्राधिकार दयेमाः धकाः माग यानाः वयाच्वंगु दु । राज्यं सलंसःदँ न्ह्यःनिसें हे दमन यानाः उत्पीडनय् लाकातःगुलिं उकिया क्षतिपूर्ति कथं अग्राधिकार माः धकाः माग यानाः वयाच्वंगु खः । वहे मागयात ध्यानय् तयाः संविधानसभाया राज्य पुनर्संरचना समिति लिसे राज्य शक्ति बा“डफा“ट समितिं तयार याःगु झिंप्यंगू प्रदेशया प्रस्तावय् सरोकारवाला जातियात प्रदेशय् निगू अवधि तक अग्राधिकार दइ धकाः व्यवस्था याःगु खः ।
लिपांगु इलय् वयाः प्रमुख दलया शीर्ष नेतातय्गु सहमतिकथं सरकारं नीस्वंगु याःगु राज्य पुनर्संरचना सुझाव आयोगं नेवाः स्वायत्त प्रदेशय् च्वंपिं नेवाःतय्त मखु नेवाः प्रदेशं पिने च्वंपिं नेवाःतय्त अग्राधिकार बिइगु निर्णय याःगु दु । आयोगं मंगलवाः जक प्रधानमन्त्री डा. बाबुराम भट्टराईयात प्रतिवेदन लःल्हाःगुलिइ उगु कथं ख“ न्ह्यथनातःगु दु । प्रदेशय् अधिकार मदैगु अले विशेष स्वायत्त क्षेत्रय् अग्राधिकार दैगु प्रस्ताव यानातःगु दु ।
आयोगं दलितया नितिं गैर भौगोलिक प्रदेश व झिगू भौगोलिक प्रदेश नापं यानाः झिंगू प्रदेशया प्रस्ताव याःगु खः । नेवाः प्रदेशय् दुने मेमेगु जातियात विशेष स्वायत्त क्षेत्र दत धाःसा अन दुने उगु जातियात अग्राधिकार दैगु व्यवस्था याःगु दु । अथे हे मेमेगु प्रदेशय् च्वनाच्वंपिं नेवाःतय्त अन विशेष स्वायत्त क्षेत्रय् अग्राधिकार दैगु अवस्था दु ।
अथे प्रदेशय् अधिकार मदयेवं आः नेवाः स्वायत्त प्रदेशया मुख्य मन्त्री न्ह्याम्ह नं जुइफुगु अवस्था वइ । नेवाःत हे नेवाः प्रदेशया मुख्य मन्त्री जुइगु अले नेवाःतय्गु हे बहुमत दैगु धैगु प्रावधान बाध्यकारी जुइमखु । उकिं थ्व छु याःगु खः धकाः आदिवासी जनजातितय्सं न्ह्यसः थनाच्वंगु दु । राज्य पुनर्संरचना आयोगया गुलिं गुलिं बांलाःगु पक्ष दुसां बास्तवय् थ्व छगू कथं भारतीय मोडलया संघीयतायात जकं नालाःकाःगु मखुला धकाः टिप्पणी यानाहःगु दु ।
