आयोगया प्रतिवेदन वये न्ह्यः हे ब्रम्हूवादीतय् कपाः स्यात

न्हूगु नेपाःया राज्य र्संरचना गुकथं यायेगु धकाः सुझाव बिइत सरकारं नीस्वंगु राज्य पुनर्संरचना उच्चस्तरीय आयोगं छन्हु-निन्हुया दुने हे थःगु प्रतिवेदन सरकारयात लःल्हाइगु जूगु दु । निलाया ई बिउगु आयोगया फुक्कं ज्या क्वचायेधुंकूसां प्रतिवेदन तयार यायेत छुं ई मगागु धासें आयोगया ई छवाः थप याःगु खः ।

थ्वहे दथुइ आयोगं पहिचानयात मू आधार दयेकाः झिगू प्रदेश दुगु थःगु प्रतिवेदन तयार यानाच्वनेवं ब्रम्हूवादी नेतातय् कपाः स्याये सुरु जूगु दु । उलि जक मखु, इमिसं आः वयाः आयोगया प्रतिवेदन तकं माने मयायेगु मनस्थिति दयेकूगु दु ।

पहिचानयात प्राथमिकता बिउगु बुखँ सार्वजनिक जुइवं शुक्रवाः न्हिनय् नेपाली कांग्रेस व नेकपा (एमाले)या मुँज्यां आयोगया प्रतिवेदन स्वीकार मयायेगु खँ धाःगु खः । लुमंकेबहजू, संविधानसभाया राज्य पुनर्संरचना व राज्य शक्तिया बाँडफाँट समितिं पहिचान व सामार्थ्यताया आधारय् थःगु प्रतिवेदन न्ह्यःब्वयेवं आयोगया माग याःगु पार्टीत थ्व हे निगू खः । तर आयोगं नं उगु हे आधारय् थःगु प्रतिवेदन न्ह्यःवयेत्यंगुलिं निगू पार्टीया ब्रम्हूवादी नेतातय्सं न्हूगु षड्यन्त्र सुरु याःगु दु ।

कांग्रेस-एमालेया तर्क
कांग्रेस व एमालें आयोगया बहुमत दुजःतय्सं एकतर्फि निर्णय याःगुलिं आयोगया प्रतिवेदन माने मयायेगु खँ सार्वजनिक याःगु दु । तर आयोगया दुजःतय्सं धाःसा थःपिंसं एकतर्फी रुपं मखसें आयोगया कार्यादेश कथं निर्णय याःगु खँ धाःगु दु ।

आयोगया निगूगु मुँज्यां सर्वसम्मत जुइमफुगु विषयलय् बहुमतं निर्णय यायेगु क्वःछिउगु खः । उगु हे आधारय् आयोगं सहमति जुइमफुगु फुक्कं निर्णय याःगु सूत्रया दावी दु । सूत्रं धाल, 'बहुमतया आधारय् निर्णय यायेगु धकाः क्वःछिउगु इलय् सहमति प्वंकेगु तर वहे आधारं पहिचानया लिधंसाय् प्रदेश निर्माण यायेगु निर्णययात माने मयायेगु धइगु बेइमानी खः ।'

सूत्रं माइन्युटय् फुक्क दुजःतय् ल्हाःचिं तकं दुगु प्रमाण दयेक दयेकं ब्रम्हूवादी नेतातय्सं थःगु अनुकूल मजुइव प्रतिवेदन माने यायेमफइगु धकाः न्हूगु षड्यन्त्र सुरु याःगु द्वपं बिउगु दु ।

जूगु छु?
संविधानसभाय् पहिचान व सामर्थ्यया लिधंसाय् १४ प्रदेशया प्रस्ताव वायेवं ब्रम्हूवादी नेतातय्सं उकीयात अस्वीकार यासें उगु प्रस्तावयात न्ह्याथे यानाः नं हिकेत आयोगया खँ ल्ह्वंगु खः । तर आयोगं नं पहिचानयात आधार दयेकाः प्रदेश निर्माण यायेवं इमित हानं टेनशन सुरु जूगु दु ।

आयोग गठनया इलय् कांग्रेस व एमालें पहिचानयात स्वयां नं क्षेत्रगत हिसाबं प्रतिवेदन वयेमाः धकाः थःगु प्रतिनिधित ल्यःगु खः । तर आयोगया दुजःत पार्टीगत स्वयां नं समुदायगत रुपं प्रस्तुत जुइवं विशेष यानाः एमालेयात समस्या जूगु खः । एमालेया हे प्रस्तावय् आयोगया सांयोजक जुयादीम्ह डा. मदन परियार व दुजः भोगेन्द्र झा एमालेया पार्टीगत खँयात स्वयां समुदायगत रुपं प्रस्तुत जुयादीगु खः । थथे जुइवं ब्रम्हूवादी नेतातय् कपाः स्यायेगु सुरू जूगु खः ।