थौं भारतयात ज्ञापनपत्र बीगु
यें (सन्ध्या टाइम्स) / दांग बाराया लिसें भारत नाप स्वाःगु नेपाःया थीथी भूभागय् भारतं याःगु अति- क्रमणया निरीक्षण यायेत राष्ट्रियहित संरक्षण समितिया नेतृत्वय् छगू पुचः कंस स्थलगत भ्रमणय् वनीगु जूगु दु । थौं सुथय् एनेकपा माओवादीया इनापय् च्वंगु सर्वदलीय बैठकं उगु निर्णय याःगु खः ।
सर्वदलीय बैठकं भारतीय पक्षपाखें जूगु अतिक्रमण व नेपाःमितय्त जूगु दमनयात कयाः भत्स्रना याःगु दु ।
थौंया बैठकय् नेपाःनाप स्वाःगु भारतीय सिमानाय्् वैज्ञानिक ढंगं पुनः सिमांकन यायेमाःगु बारे भारत सरकारलिसे सहलह यायेगु निर्णय नं याःगु दु । थुकिया निंतिं माओवादीं पहल यायेगु निर्णय नं याःगु खँ धाःगु दु ।
थ्वहे झ्वलय् थौं माओवादी समर्थित भातृ संगठनतय्सं थौं भारतीय राजदुतावासय् विरोधपत्र बीगु ज्याझ्वः दु । थौं न्हिनय् ३ बजे उगु ज्ञापनपत्र लःल्हाइ ।
थ्वहे विषययात कयाः थौं थीथी राजनीतिक पार्टी समर्थित १२ गू विद्यार्थी सगठनतय् मंकाः बैठक नं च्वंगु दु । बैठक लिपा थौं हे ३ बजे प्रधानमन्त्री माधव नेपालयात ज्ञापनपत्र बीगु निर्णय नं याःगु दुसा भारतीय दूतावासय् नं ज्ञापनपत्र बीगु निर्णय याःगु दु । विद्यार्थीतय्सं मेगु ज्याझ्वः नं बीफु धाःगु दु ।
