मन्त्रालय विभाजनय् अझं विवाद
यें (सन्ध्या टाइम्स) / सरकारया नीति तथा कार्यक्रम पारित जुल तर मन्त्री जुइपिनि नां धाःसा अझं पारित मजूनि । सूत्रतय्सं बिउगु जानकारी कथं म्हिगः २२ दलया बैठकं सरकारया नीति तथा कार्यक्रम पारित यायेवं तिनि प्रधानमन्त्री माधव नेपालं भचा राहत महसुस यानादीगु खः । म्हिगः नीति तथा कार्यक्रम पारित जुइवं थौं नेपालं थीथी दलया नेतात नापलानाः मन्त्री जुइपिनि नां याकनं बी माल धकाः ताकेता शुरु यानादीगु दु ।
कांग्रेसं महत्वपूर्ण मन्त्रालयत मध्यय् परराष्ट्र व संचार निगुली जक दावी यानाच्वंगु दु । तर फोरमं गृह हे ताके याःगुलिं नेपालयात समस्या वयाच्वंगु दु छाय्धाःसां एमालेया ओली पुचलं गृह त्वःते मते धकाः वय्कःयात उतिकं दवाव बियाच्वंगु दु ।
लिसें स्वयम एमालें नं आः तक मन्त्री जुइपिनि नां क्वःछी फयाच्वंगु मदुनि । एमालेपाखें आः मन्त्री जुयाच्वंपिं स्वम्हं ब्रम्हू खःसा आः वनेत्यंपिं भिम रावल शंकर पोखरेल व विष्णु पौडेल नं ब्रम्हू हे खः । थीथी जातियापिंत राज्य मन्त्री जक दयेकाः समावेशी यायेगु खँ प्रम नेपालं थौं थःथाय् वःगु छगू डेलिगेशनयात कनादीगु दु ।
