आयल निगमया न्ह्यःने आत्मदाह यायेगु घोषणा
पेट्रोलियम पदार्थया मुल्य बृद्धिया विरोधय् थीथी कथं आन्दोलन याना वयाच्वंगु झ्वलय् लिपांगु इलय् आत्मदाह तक यायेगु घोषणा याःगु दु । झिम्ह ल्याय्म्हतय्सं सरकारया पेट्रोलियम पदार्थय् जूगु मुल्य बृद्धि लित मकाःसा वइगु माघ १४ गते नेपाल आयल निगमया न्ह्यःने आत्मदाह यायेगु घोषणा याःगु खः ।
जनताया मुक्तिया निंतिं आत्मदाहया निर्णयलय् थ्यंगु धाःगु दु । उत्पीडित युवा नेपालय् आवद्ध थीथी ब्वनेकुथिया ल्याय्म्हतय्सं पेट्रोलियम पदार्थ, लोडसेडिङ, न्हियान्हिथं छ्यलेमाःगु वस्तुइ जूगु मुल्यवृद्धिं याना सर्वसाधारणया जीवन कष्टकर जुया वनाच्वगु धासें माघ १४ गते नेपाल आयल निगमया न्ह्यःने संयुक्त कथं आत्मदाह यायेगु चेतावनी बिउगु खः ।
मंगबाः छगू पत्रकार सम्मेलनया झ्वलय् थःगु ५ सुत्रीय माग सरकारं ३ दुने पूवंकेत अल्टिमेटम नं बिउगु दु । अथेहे माघ ११ गते १० बजे आयल निगमया न्ह्यःने राष्ट्रिय झण्डा ज्वनाः धर्ना, १२ गते सिंहदरबार न्ह्यःने राष्ट्रिय झण्डा ज्वनाः धर्ना, १३ गते अन्तर्राष्ट्रिय सम्मेलन न्ह्यःने छःन्हुया अनसन यायेगु विरोधया ज्याझ्वःत सार्वजनिक याःगु दु ।
