थुगुसीया एसएलसीया न्ह्यसःपौ छापे यायेगु जिम्मा जनकशिक्षायात
थुगुसीया एसएलसीया न्ह्यसःपौ छापे यायेगु जिम्मा जनकशिक्षा सामग्री केन्द्र लिमिटेड सानोठथिमीयात लाःगु दु । न्ह्यसःपौ नेपालय् हे छापे यायेगु सार्वजनिक लेखा समितिया निर्देशन कथं जनकशिक्षायात उगु जिम्मा लाःगु खः । न्हापा भारतय् न्ह्यसःपौ छापे यानावयाच्वंगु इलय् नेपाःया करोडौ धेबाः पिनेवनीगु व भ्रष्टाचार जुइगु द्वपं लागुलिं न्ह्यसःपौ नेपालय् हे छापे यायेगु ज्या न्ह्याःगु खः ।
थ्वहे वइगु माघ १२ गतेनिसें जनकशिक्षाय् कडा सुरक्षा व्यवस्था व अति गोप्यताया दथुइ न्ह्यसःपौ छापे यायेगु ज्याः न्ह्याइगु खँ जनकशिक्षां धाःगु दु । जनकशिक्षाया सानोथिमीइ च्वंगु केन्द्रीय ज्याकूथी च्वंगु सेक्युरिटी प्रेसय् सुरक्षा घेराया दुने न्ह्यसःपौ छापे याइगु खँ नं धाःगु दु ।
थुगु दँय् छगू करोड थान न्ह्यसःपौ छापेयागु, नीन्हु निसें नीन्यान्हुया दुने न्ह्यसःपौ छापेयायेगु ज्याः पूवंकेगु लक्ष्य परीक्षा नियन्त्रण ज्याकूथीं कयातःगु दु ।
सुरक्षा व्यवस्था थुकथं दु :
नेपाली सेना, नेपाल प्रहरी व सशस्त्र प्रहरीया स्वंगू घेराया सुरक्षाया व्यवस्था यानातःगु दु । नापं न्ह्यसःपौ छापेयाइपिं गोप्य शाखाया कर्मचारीयात ज्याः पूमवतल्ले छेँय् मछ्वयेगु, छेँजः नाप नापलाकेमबिइगु व मोवाइल छ्यले मदइगु व्यवस्था यानातयाःगु दु ।
गोप्यताया निंतिं न्ह्यसःपौ छापे यायेगु थासय् झिंखुगः सिसिटिभी जडान यायेगु, परीक्षा नियन्त्रण ज्याकू व केन्द्रया प्रमुख व्यक्तित्वयात सेक्युरिटी प्रेसय् हे निगरानी यायेगु व्यवस्था यानातःगु खँ परीक्षा नियन्त्रण ज्याकूथीं धाःगु दु ।
