कांग्रेसं सरकारय् वनीगु नां ढल लःल्हात
सुजाताया नेतृत्वय् खुम्हेसिया नां
एमाले नेतृत्वया सरकारय् नेपाली कांग्रेसपाखे ब्वति काइपिं मन्त्रीतय् नां ढल प्रधानमन्त्री माधवकुमार नेपालयात लःल्हाःगु दु ।
बिहिवाः सुथय् कांग्रेस सभापति गिरिजाप्रसाद कोइराला निवास महाराजगंजय् च्वंगु बैठक लिपाः कांग्रेसं नां ढल छ्वःगु खः । कांगेसं लःल्हाःगु नां ढलखय् सुजाता कोइराला, डा. प्रकाशशरण महत, डा. मिलेन्द्र रिजाल, पूर्णकुमार शर्मा, बालकृष्ण खाँड व उमाकान्त चौधरीया नां दुथ्याःकातःगु दु । थौं च्वंगु बैठकं मन्त्रीमण्डलय् दुथ्यापिं नेतातय् नां ल्यसां सुयात छु मन्त्रालय् बीगु धकाः निर्णय मयानी ।
बैठक लिपा कांग्रेस पाखें सरकारय् नेतृत्व याइम्ह सुजाता कोइरालां थ्व नां ढल प्रधानमन्त्री नेपालयात लःल्हानादीगु खः ।
थौं च्वंगु बैठकय् सभापति कोइरालां सुजाताया नांमय् विवाद मयायेत इनाप यानादीगु खः । बैठकय् कांग्रेसया वरिष्ठ नेतातय्सं ब्वति कासां कार्यवहाक सभापति सुशील कोइराला व उप सभापति रामचन्द्र पौडेल धासाः बैठकय् ब्वति मकासें जुम्ला वंगु दु ।
