सीमा अतिक्रमणबारे स्थलगत अध्ययन याइगु
भारतीय पक्षपाखें याःगु सीमा अतिक्रमणया बारे स्थलगत अवलोकन यायेत सभासद्तय् छगू पुचः उखे पाखे वनीगु जूगु दु । बारा, दाङ लगायतया जिल्लाय् जूगु सीमा अतिक्रमणया अध्ययन यायेत माओवादी नेता अमिक शेरचनया संयोजकत्व छगू कार्यदल उखे पाखे वनीगु जूगु दु । अथेहे संविधानसभाय् प्रतिनिधित्व याइगु झिंच्याःगु दलं समाधनया निंतिं कुटनीतिक पहल न्ह्याकेत सरकारया ध्यानाकर्षण याःगु दु ।
माओवादीया आव्हानय् बिहिवाः सुथय् च्वंगु सर्वदलीय बैठकं पटक पटक सीमा अतिक्रमणया खँय् विवाद खनेदुगुलिं कुटनीतिक पहलं समस्याया समाधन मालेत इनाप याःगु दु ।
बैठकय् माओवादी वरिष्ठ नेता डा. बाबुराम भट्टराईं राष्ट्रियता, स्वाधीनता व सार्वभौमिकताया निंतिं दक्वं दल छप्पं जुइमा:गु खँय् ब: बियादिसें स्थलगत अवलोकनया निंतिं वनीगु कार्यदलय् दक्वं दलया छम्ह छम्ह प्रतिनिधि दुथ्याइगु जनाकारी बियादिल । अथेहे बैठकय् सीमा अतिक्रमणया खँय् व्यवस्थापिका संसदय् यंकेगु नं सहमति जूगु दु ।
माओवादीं आह्वान याःगु बैठकय् कांग्रेस, फोरम, तमलोपा, सद्भावना लगायतया दलतय्सं धासाः ब्वति मकाः । बैठकय् सत्ता नेतृत्व यानाच्वंगु दल एमालेया पाखें धासाः नेता बामदेव गौतमं ब्वतिकयादीगु ख: ।
