मंकाः ज्याझ्वःलय् नीनिगू दल पाखें हस्ताक्षर
सरकारया मंकाः न्युनतम ज्याझ्वःलय् एमाले सरकारयात समर्थन याइगु नीनिगू दलया नेतातय्सं हस्ताक्षर
याःगु दु ।
सिंहदरवारय् बुधवाः च्वंगु नीनिगू दलया बैठकं एमाले नेतृत्वया सरकारया मंकाः न्युनतम ज्याझवःयात अन्तिम रुप ब्यूगु खः । अथेहे सरकार संचालनया कार्यविधि, मन्त्रीतय् आचारसंहिता व उच्च स्तरीय राजनीतिक संयन्त्र गठन प्रकृयाय् नं दक्वं दलं हस्ताक्षर याःगु दु ।
राज्य पुर्नसंरचनाया खँय् धासाः मधेशवादी दलत नाप न्हापाः जूगु सम्झौता कार्यान्वयन यायेगु, वेपत्ता नागरिकत मालेगु नापं सहिदया छेँजःया निंतिं उच्चस्तरीय आयोग गठन यायेगु, न्हापाया सरकारं सदनय् पेश याःगु समावेशीय विधेकयात न्ह्यनेयंकेगु लगायत बुँदात दुथ्याकातःगु दु ।
अथेहे सामाजिक-आर्थिक संरचना व शान्ति-सुरक्षा व विकास-निर्माण लगायतया खँय् नं ज्याझ्वलय् न्ह्यंथनातःगु दु ।
बैठक लिपाः प्रधानमन्त्री माधवकुमार नेपालं मंकाः ज्याझ्वःलय् हस्ताक्षर याये धुंकाः सरकारयात पूर्णता बीत दक्वसितं ग्वहालि यायेत इनाप यानादिल ।
मंकाः सरकारया मुख्य प्राथमिकताय् राजनीतिक दलत दथुइ राष्ट्रिय सहमतिया निर्माण, बिधिया शासन व सुशासनया प्रतायभूति, सहमति व सम्झौतायात कार्यान्वयन यासें शान्ति प्रकृयायात पूर्णता बीगु खँ न्ह्यथंनातःगु दु ।
अथेहे, निर्धारित ई दुने राष्ट्रिय सहमतिया आधारय् राज्यया पुर्नसंरचना व न्हूगु संविधानया निर्माण, आपूर्ति व्यवस्थाय् सुधार, बजाः भा नियन्त्रण, जनताया निंतिं राहत व पुननिर्माण व आर्थिक विकासयात तीव्रता बीगू नं न्ह्यथंनातःगु दु ।
