भाः थकागु विरोधय् विद्यार्थीत आन्दोलित
सरकारं पेट्रोलियम पदार्थय् भाः थकागु विरोधय् झिंस्वंगू विद्यार्थी संगठनत आन्दोलित जूगु दु । सरकारं भाः थकागु कन्हय् कुन्हु बिहीवाः येँय् च्वंगु झिंस्वंगू विद्यार्थी संगठनतय् मंकाः मुँज्यां आन्दोलनया घोषणा याःगु खः । विद्यार्थी संगठनतय्सं सरकारयात पेट्रोलियम पदार्थया भाः नीप्यघौ दुने लितकायेत अल्टिमेटम नं बिउगु दु ।
प्रधानमन्त्री डा. बाबुराम भट्टराईया पार्टीया विद्यार्थी संगठनया नं ब्वति दुगु उगु मुँज्यां स्वनिगः बन्द लगायतया आन्दोलन घोषणा याःगु दु । आन्दोलनया ज्याझ्वः कथं ६ गते ग्यास सिलिण्डर सहित देय्न्यंक प्रदर्शन, ७ गते थीथी जिल्लाय् कोणसभा, ८ गते शिक्षण संस्था न्ह्यःने धर्ना, ९ गते आयल निगम घेराउ, १० गते देय्न्यंक मसाल जुलुस व ११ गते स्वनिगः बन्द यायेगु निर्णय याःगु दु ।
थ्वस्वयां न्ह्यः सरकारं बुधवाः तच्वयेक पेट्रोलियम पदार्थया भाः थकागु खः । सरकारं पेट्रोलय् झितका, डिजेल व मचिकंलय् गुतका, आन्तरिक हवाई इन्धनय् न्यतका व ग्यास प्रतिसिलिन्डरय् सच्छि व न्हय्न्यतका अप्वयेकूगु खः ।
