संविधानया मस्यौदाय् सहलह जारी
राष्ट्रिय हित संरक्षण समितिं न्ह्यब्वःगु संविधानया मस्यौदा व अवधारणाय् बुधवाः स्वन्हुया न्हि नं संविधानसभाय् सहलह जूगु दु ।
एकीकृत नेकपा (माओवादीं) अवधारणा पौ व मस्यौदाया बचाउ यासां मेगू दलया सभासदतय्सं झिंच्यादँ दुपिं नागरिकतय्त सैनिक तालिम बीगु व 'जनमुक्ति सेना' खँग्व सान्दर्भिक मजूगु धासें विरोध याःगु दु ।
माओवादी सभासद् अग्नी सापकोटां जनताय् राष्ट्रिय जागरण ब्वलंकेत झिंच्यादँ दुपिं नागरिकतय्त फौजी तालिम बीमाःगु बीचाः प्वंकादिल । वयेकलं देय्या रक्षाया निंतिं जनताया आत्मविश्वास व मनोवल अप्वयेकेत सैन्य तालिम आवश्यक जूगु धासें नेपाली सेनां जक राष्ट्रियताया संरक्षण यायेमफइगु धयादिल ।
काग्रेस सभासद् पुष्पा भुसालं राजनीतिक दलया सहमितं मंकाः दस्तावेजया रुपय् न्हूगु संविधान देयेके न्ह्यः माओवादी लडाकूतय् व्यवस्थापन जुइधुंकीगुलिं संविधानसभाय् जनमुक्ति सेना धकाः च्वयेगु आवश्यकता मदु धयादिल । वयेकलं बहाय आक्रमणं छुं खतरा मदुगु धासें झिंच्यादँ क्यंगु नागरिकतय्त सैनिक तालिम बीमाःगु आवश्यकता मदुगु धयादिल ।
एमाले सभासद रामचन्द्र झां नागरिकयात सैनिक तालिम ब्यूसाः हिंस्रक मनोविज्ञान अप्वइगु व दक्वसित ल्वाभ उपलब्ध यायेमागुलिं द्वन्द्वयात प्रोत्साहन याइगु धयादिल । सभासद् निलाम्बर आचार्यं दक्व राजनीतिक शक्तित दथुइ मेलमिलापया आवश्यकता जूगु धासें छम्हं मेम्ह नाप सर्वोच्चताया खँ ल्हायेगु ई आः मजूगु धयादिल । अथेहे सभासद् गौरी महतो कोइरीं बाराय् निसः व न्ययेगू सीमा स्तम्भ तनाच्वंगुलिं उकी नेपाल सरकारया ध्यन मवंगुलिं असन्तुष्टि प्वंकादिल ।
