नीति तथा कार्यक्रमय् दुथ्याके हे माःगु खँ
सरकारं थःपिनि मंकाः कार्यक्रम तयार यानाः पित बीगु तयारी यानाच्वंगु दु । उकिया निंतिं गठन याना तःगु प्यंगू तःधंगु पार्टीया कार्यदलं थःपिनि ज्यायात अन्तिम रुप बीगु तयारी यायेधुंकूगु दु । आः याकनं हे शिर्ष नेतातय्सं उकियात पारित याइगु खँ प्रकाशय् वःगु दु ।
खतुं पिने प्रचारय् वयाच्वंगु चर्चा कथं आः सरकारं दयेकाच्वंगु नीति तथा कार्यक्रमय् न्हापा न्हापाया सरकारतय्सं छु कार्यक्रम तयातःगु खः थुकी नं अज्याःगु हे जक तयातःगु दु । उकी छुं खास हिउपाः मदु । अथे खःसां सेना समायोजन सम्बन्धी छुं खँय् धाःसा आः हिउपाः वइगु खनेदु । छाय्धाःसां न्हापाया सरकार व आःया सरकारया बिचाः दथुइ थ्व मामिलाय् तःधंगु भिन्नता दु ।
मेगु खँ, आः सरकारं दयेकीगु नीति तथा कार्यक्रमय् कम से कम नं जनतां देशय् न्हूगु हिउपाः वयेधुंकल धइगु छुं आभास बीगु जकसां ज्या जुइगु खँ दुथ्याःसा बांलाइ । खास यानाः जाति भाषाया लागिं आन्दोलन यानाच्वंगु पुचःतय्सं यानाच्वंगु माग थुकी उल्लेख जुइमाःगु खनेदु । न्हापाया सरकारं थ्व दिशाय् छुं ज्या याःगु खःसां उकियात पूवंकेगुपाखे छुं याये मखन । आःयागु सरकारं अथे यायेमाःगु खनेदु । यद्यपि आःया गठबन्धनय् दुथ्याःपिं राजनीतिक पार्टीत आदिवासी जनजातिया माग प्रति उदासिन पुचःत जक दुगुलिं उमिसं थुखेपाखे छुं याइ धइगु आशा म्हो जक दु । सरकारया गठबन्धन स्वयेबलय् थुकी हे दुथ्याःगु मधेशी जनअधिकार फोरमया माग समेत लागू जुइ धइगु शंका दु । थ्व अवस्थाय् पिनें जनजाति आन्दोलन तच्वयाः सरकारयात मछिनीगु व दुनें समीकरणय् गडबडी वयां तुं च्वनीगु खतरा दया हे च्वनी ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
