फुक्कं बांलाःगु मन्त्रालयय् ओलीया दावी
येँ / (सन्ध्या टाइम्स)न्हूगु सरकारय् मन्त्री जुइपिनि नांयात कयाः नेपाली कांग्रेस व फोरम दुने जुयाच्वंगु ल्वापु समाधान यायेगु कुतः यायां हे एमाले दुने नं अज्याःगु हे ल्वापु शुरु जूगु खँ सीदुगु दु । सूत्रतय्सं बिउगु जानकारी कथं एमाले नेता खड्ग ओलीं एमालेया भागय् लाः वयेत्यंगु गृह, अर्थ व जलश्रोत थेंज्याःगु प्रमुख मन्त्रालयत थःगु गुटया मनूतय्त बीमाः धकाः दवाव बीवं एमाले दुने थ्व कचवं पिहां वःगु खः । छखे थ्व फुक्क प्रमुख मन्त्रालयत एमालेयात बी मखु धकाः कांग्रेसं दवाव बियाच्वंगु दुसा मेखे बि हे बिउसां फुक्कं मन्त्रालय ओली पक्षयात बीबलय् अध्यक्ष झलनाथ खनालं विरोध याइगु सम्भावना खने दयाः एमालें नं मन्त्री जुइपिनि नां तयार याये मफयाच्वंगु खँ धाःगु दु । सूत्रतय्सं धाः कथं यदि बांलाःगु मन्त्रालयत थः मनूयात मबिल धाःसा थम्हं रक्षा मन्त्रीपाखें राजीनामा बिया बी धकाः विद्या भण्डारीं ख्याच्वः बियाहःगु दु ।
उखे कांग्रेसय् नं सरकारया नेतृत्व सुजाता कोइरालां याइगु धकाः निर्णय जुइवं गिरिजाया खास मनू धयातःपिं सुशील कोइराला वा रामचन्द्र पौडेलं नं विरोध याना हःगु दु ।
