सद्भावनाया नायः गुप्तायात ज्वन
नेपाल सद्भावना पार्टी (आनन्दीदेवी)या नायः नापं सभासद् श्याम सुन्दर गुप्तायात सोमवाः पुलिसं ज्वंगु दु । व्यापारी पवन संघाई अपहरण काण्डय् संलग्नताया द्वपंलय् गुप्तायात ज्वंगु खः । भैरहवास्थित गुप्ताया छेँ हे वनाः पुलिसं गुप्तायात सोमवाः सनिलया ४ बजे ज्वना यंकूगु खँ वय्कया काय् कैलास गुप्तां धाःगु दु ।
अपराध अनुसन्धान महासाखा हनुमान ढोकाया इनापय् रुपन्देही पुलिसं गुप्तायात ज्वंगु खः । गुप्तायात सोमवाः हे प्लेनलय् तया येँ हःगु दु । गुप्तायात येँया हनुमानढोकाय् कुनातगु दु ।
पुलिस स्रोतया कथं संघाई अपहरण काण्डया योजना व धेबाः इनेगुलिइ सभासद गुप्ताया संलग्नता दु ।
