विषादीं विद्यार्थी प्रभावित
वीरगाज / (सन्ध्या टाइम्स) बाराया अमलेखगाजय् च्वंगु हानिकारक विषादी व्यवस्थापन यायेत माग याःगु दु । विश्व वातावरण दिवसया लसताय् म्हिगः जूगु पत्रकार सम्मेलनय् न्ववासें जागृति विकास माचया अध्यक्ष रमारानी श्रेष्ठं उगु माग यानादीगु खः ।
ताः ई न्ह्यः हे म्याद फइधुंकूगु विषादीया कारणं स्थानीय जनताया स्वास्थ्यय् लिच्वः लाःसां सरकारं चिउताः मतःगु द्वपं नं श्रेष्ठं बियादिल । अमलेखगाजया छगू विद्यालय लिकसं च्वंगु गोदामय् उगु विषादी तयातःगु कारणं आपालं विद्यार्थी विरामी जुयाच्वंगु दुसा गुलिखे विद्यार्थीतय्सं स्कूल तकं त्वःताहःगु दु । गोदाम जःखः च्वंगु वस्तिया जनता नं प्रभावित जुयाच्वंगु दु ।
उगु गोदामय् प्रतिबन्धित ५१ मेटि्रक टन विषादी भन्डारण यानातःगु दुसा विषादी नष्ट यायेत थीथी इलय् चर्चा जूसां सरकारं थुकी ध्यान मतःगु द्वपं दु । विश्वय् प्रति- बन्धित थ्व विषादी उत्पादन याःगु देशय् हे लित छ्वयेमाःगु खःसां नं सरकारं छुं हे कथंया कुतः मयानाच्वंगु द्वपं बिउगु दु । भन्डारण जुयाच्वंगु विषादी विदेशी दातृ निकायतय्सं २०३० सालय् कृषि सामग्री संस्थानयात बिज वृद्धि कार्यक्रम अन्तर्गत विदेशी दातृ राष्ट्रतय्सं अनुदान बिउगु खः । उगु विषादीया बारे सर्वोच्च अदालतय् तकं मुद्दा लानाच्वंगु दु ।
