नेपाल बौद्ध परियत्ति शिक्षाया दीक्षान्त समारोह
येँ / (सन्ध्या टाइम्स)नेपाल बौद्ध परियत्ति शिक्षा २५५२ दँया ४६ क्वःगु पुचःया दीक्षान्त व सिरपाः इनेज्या शनिवाः विश्व शान्ति विहार न्हू वानेश्वरय् जुल । म्यान्मारया महामहिम राजदूत यू थेट ऊया मूपाहांसुइ ज्याझ्वः जूगु खः । ज्याझ्वलय् स्वद्वः विद्यार्थी जाँच बिउपिं मध्ये पास जूपिं नीन्यासः नीखुसः मध्ये बोर्ड हयाः पास जूपिं नीछम्हेसित दीक्षान्त समारोहय् सहभागी याःगु खः । अथे हे थुगुसी कोविद परीक्षाय् ताःलाःपिं झिंछम्ह विद्यार्थीपिंत सिरपाः लःल्हाःगु खः ।
अखिल नेपाल भिक्षु महासंघया अध्यक्ष भिक्षु बोधिसेन महास्थविरया सभापतित्वय् जूगु ज्याझ्वलय् महासंघया सचिव भिक्षु धर्ममूर्तिपाखें लसकुस यानादीगु खःसा बोधिज्ञान भन्तें प्रतिवेदन ब्वनाः न्यंकूगु खः । भिक्षु बोधिसेनपाखें दीक्षान्त समारोहय् प्रतिज्ञा बाचन याना न्यंकूगु खःसा रत्नसुन्दर शाक्यं परियत्ति शिक्षाया महत्व बारे ध्याथुइकादीगु खः । विद्यार्थीतय् प्रतिनिधित्व यानाः अनागारिका खेमापाखें थःगु नुगः खँ कनाबिज्याःगु खः । पाचशील प्रार्थना याना शुरु याःगु ज्याझ्वः पुन्यामोदन याना क्वचायेकूगु खः ।
