'ग्वाय्मरु'यात पब्लिक च्वाइस अवार्ड
येँ / (सन्ध्या टाइम्स) प्यन्हुयंकं न्ह्याःगु स्वक्वःगु नेपाल अन्तर्राष्ट्रिय आदिवासी चलचित्र महोत्सव आइतवाः भृकुटी मण्डपय् जूगु छगू ज्याझ्वःया दथुइ थीथी सिरपाः व अवार्ड लःल्हासें क्वचाल । थुगुसी नेपालभाषाया 'ग्वाँय्मरु' डकुमेन्ट्रीयात पब्लिक च्वाइस अवार्ड देछाःगु खः । मध्यपुर थिमिया छम्ह ज्याथम्ह कुम्हाः दाजुं यायेमाःगु दुःख व यातनायात कयाः प्रिनराज जोशीं तयार यानादीगु उगु डकुमेन्ट्रीयात समीक्षक छनौट पुरस्कार कथं ख्वपया कलात्मक म्हय्खाझ्याःया नमूना देछाःगु खः । नापं मनोज पाण्डेपाखें दयेकूगु 'लिभि अन द रिभर' नांगु वृत्तचित्रयात नं प्रोत्साहन सिरपाः बिउगु खः । महोत्सवय् स्कुजी ब्यान्डिट न्हाप, माओत्से गुरुङया 'तिनागा' लिउ व इलेन अस्तिपाखें निर्देर्शित 'सडेन्ली सामी' चलचित्र लियां लिउ लाःगु खः ।
आइतवाः राष्ट्रिय सभागृहय् महोत्सवया संयोजक नविन सुब्बा व थीथी व्यक्तितय्सं उगु सिरपाः लःल्हाःगु खः । 'द लङ जर्नि' नांगु जनजातितय्सं अधिकार प्राप्त यायेत याःगु संघर्ष बारे नविन सुब्बां तयार याःगु चलचित्र क्यनाः थुगुसीया चलचित्र महोत्सव क्वचायेकूगु खः । महोत्सवय् ६६ गू स्वदेशी विदेशी चलचित्रत क्यंगु खः । उकि नेपाःया आदिवासीतय्गु खुगू भाषाया चलचित्र न्ह्यब्वःगु खः ।
