'संसदीय व्यवस्था माने यायेफइमखु'
एकीकृत नेकपा (माओवादी)या छ्याञ्जे सीपी गजुरेलं छुं नं हालतं संसदीय व्यवस्था माने यायेमफइगु खँ धयादीगु दु । माओवादी राष्ट्रपति कार्यकारी जुइगु व्यवस्था प्रति अडिग दुगु धयादिसें गजुरेलं संसदीय व्यवस्था माने यायेमाःगु खःसा थःपिंसं जनयुद्ध यायेमाःगु आवश्यकता मदुगु स्पष्ट यानादिल ।
रिपोटर्स क्लबं मंगलवाः येँय् याःगु साक्षात्कार ज्याझ्वलय् गजुरेलं कांग्रेस व एमालें इच्चा याःगु कथंया संविधान निर्माण जुइमफइगु धयादिल । पार्टीं ल्ह्वंगु गम्भीर विषयवस्तुयात छुं नं हालतं मत्वतेगु धयादिसें वय्कलं उकीया विषयलय् पार्टी केन्द्रीय समितिया मुँज्याय् लिखित प्रस्ताव हे वःगु धयादिल ।
कार्यकारी राष्ट्रपति जुइगु व्यवस्था नापं आत्मनिर्णयया अधिकार सहितया संघीयता दुगु संविधान निर्माणया मागय् थःपिं ल्यूने वनेमफइगु खँ नं वय्कलं धयादिल ।
