मोबाइल सेवा गुणस्तरीय यायेत मंकाः टावर
येँ / (सन्ध्या टाइम्स) मोबाइल सेवायात अझ गुणस्तरीय यायेगु ल्याखं नेपाल दूरसंचार प्राधिकरणं मोबाइल सेवा प्रदायक कम्पनीत लिसे जानाः टावरया लिसें पिनेया पूर्वाधारत नं मंकाः कथं ज्याख्यलय् छ्यलेगु योजना न्ह्याकूगु दु ।
थुकिया निंतिं प्राधिकरणं मोबाइल सेवा संचालकत नापं जानाः अप्टिकल फाइबर पावर उपकरणत संयुक्त रुपं छ्यलेगु कथं ज्या न्ह्याकूगु दु । प्राधिकरणया छम्ह अधिकारीं दक्वं कम्पनीं पूर्वाधार दयेकेबलय् छखे लगानी बढे जुइगु व मेखे गुणस्तरय् नं समस्या खनेदुगुलिं सकलें छप्पँ जुयाः उगु प्रयोगयात छ्यलेगु ज्या प्राधिकरणं शुरु याःगु खँ कनादिल ।
उम्ह अधिकारीं भौतिक पूर्वाधार सकलें जानाः छ्यलेमाःगुया कारण टावरय् खने दुगु समस्यां यानाः खः धयादिल ।
थौं कन्हय् स्वंगू मोबाइल कम्पनीया देय्न्यंकं झिंन्यासः टावर दुसा देय्या दक्वं थासय् मोबाइल सेवा विस्तार यायेत झिद्वं टावर मालीगु खँ धाःगु दु ।
प्राधिकरणं छगू कम्पनीं दयेकूगु पूर्वाधार मेगु कम्पनीतसें बालं कयाः आःयात गुंगू जिल्लाय् नमूनाया रुपय् संचालन याइगु जूगु दु ।
