चितवनय् नेवाः संघया मुँज्या
नेपाल लोकतान्त्रिक नेवाः संघया केन्द्रीय कमिटीया पूर्ण मुँज्या चितवनय् क्वचाल । निक्वःगु राष्ट्रिय सम्मेलन धुंकाः जूगु थुगु मुँज्याय् संघया कार्ययोजना व ज्या भाला इने ज्या जूगु खः । संगठन विस्तार व सुदृढीकरण यायेगु निंतिं खुलाया योजना सहित संघं थीथी प्रस्ताव पारित याःगु दु ।
अथेहे थौंकन्हय् स्वनिगःया थीथी थासय् लँ तबला यायेगु नामय् अनया आदिवासी नेवाःतय् छेँ व जग्गा विना मुआब्जा बलजफ्ती त्यला कायेगु सरकारया ज्याया विरोध याःगु दु ।
उकथं हे राज्यपुनर्संरचनाया सवालय् नेवाः प्रदेश मदइगु कथं बिना पहिचानया प्रदेश निर्माण यायेगु षडयन्त्र थीथी पार्टी दुने न्ह्याःगु खँय् सतर्क जूसें नेवाःतय्सं नेवाः प्रदेशया निंतिं अझ छप्पँ जुया संघर्ष यायेगु ई वयेत्यंगुलिं उज्वःगु षडयन्त्र विरुद्ध छप्पँ छधी जुया वनेगु निर्णय नं संघं याःगु दु ।
चितवनय् संघया प्रशिक्षण ज्याझ्वः
नेपाल लोकतान्त्रिक नेवाः संघ चितवन जिल्लाया ग्वसालय् प्रशिक्षण ज्याझ्वः क्वचाल । संघीयता, नेवाः राज्य व पिने च्वंपिं नेवाःतय् दायित्वया बारे नापं आदिवासी जनजाति अधिकार व आइएलओ १६९या बारे प्रशिक्षण बिइगु ज्या जूगु खः । चितवन जिल्लाया थीथी थासं वःपिं संघया दुजःत दुथ्याःगु उगु ज्याझ्वलय् संघया संस्थापक सल्लाहकार व एमाले नेता राजेन्द्र श्रेष्ठ, आदिवासी जनजाति महासंघया त्रिरत्न शाक्य, संघया पुलांम्ह नायः सानुराजा शाक्य, वर्तमान नायः कृष्ण बहादुर घःजु, न्वकू न्हूच्छेलाल महर्जन लगायतं प्रशिक्षण बियादीगु खःसा उगु ज्याझ्वलय् संघया केन्द्रीय दुजःपिं उद्योग कुमार पिया, सुमन श्रेष्ठ, चितवनया एमाले नेता शैलेन्द्र पिया, संघया चितवन जिल्ला नायः राजेन्द्र कुमार पिया, किरण कुमार अमात्यपिसं नं न्ववानादीगु खः ।
