पासपोर्ट दुरुपयोग याःम्ह सभासद् अख्तियारया हिरासतय्
कुटनीतिक पासपोर्ट दुरुपयोग याःगु अभियोग लानाच्वम्ह सभासद् नारदमुनी रानायात अख्तियारं हिरासतय् काःगु दु । ताः ई निसें प्रहरीपाखें बिस्यूं वनाच्वम्ह सभासद् राना आइतवाः थः हे अख्तियारय् हाजिर जुयादीगु खः ।
संविधानसभाय् नेकपा (एमाले)पाखें समानुपातिक कोटाय् सभासद् जुयादीम्ह रानां झिगू लखय् थःगु कुटनीतिक पासपोर्ट मिउगु द्वपंलय् अख्तियारं छानबिन यानाच्वंगु दु । रानायात सोमवाः हे विशेष अदालतय् पेश यानाः अनुसन्धान न्ह्याकीगु जूगु दु ।
थ्वस्वयां न्ह्यः राहदानी ऐन २०२४या दफा ५या कसुर कथं जिल्ला अदालतय् मुद्दा दर्ता यायेवं रानायात वंगु असार २० गते अनामनगरस्थित थःगु हे छेँ नं ज्वंगु खः । लिपा जिल्ला अदालतं गुद्वः व न्यसः धरौटीइ त्वःतुगु खः ।
