मन्त्रीमण्डल विस्तार स्वंगू चरणय् याइगु
पार्टी दुने आन्तरिक विवादया कारणं प्रधानमन्त्री माधवकुमार नेपाल नेतृत्वया सरकारया मन्त्रीमण्डल विस्तार स्वंगू चरणय् याइगु जूगु दु ।
नेपाली कांग्रेस व मधेशी जनअधिकार फोरमया अन्तरिक विवादया दथुइ थौं निगूगु चरणया मन्त्रीमण्डल विस्तार यायेगु तयारी जुयाच्वंगु दुसाः स्वन्हु लिपाः लिपांगु चरणया मन्त्रीमण्डल विस्तार यायेत्यंगु दु । थौं नेपाली कांग्रेस पाखें सुजाता कोइराला व मधेशी जनअधिकार फोरम पाखें विजयकुमार गच्छदार नपां एमाले पाखें निम्ह मन्त्री नियुक्त यायेगु तयारी जुयाच्वंगु दु ।
थ्वहे दथुइ थौं प्रधानमन्त्री नेपालं सरकारयात पूर्णता बीत कांग्रेस, फोरम, तमलोपा व सद्भावना पार्टीया नेतात नाप नापलाना खँल्हाबंला यानादीगु दु ।
कांग्रेस नेतात शेरबहादुर देउवा व कृष्ण सिटौला नाप जूगु खँल्हाबंलाय् थौं बहनी दुने कांग्रेसं सरकारय् ब्वति काइपिनि नां ढल लःल्हायेगु सहमति जूगु खः । अथेहे तमलोपां नं थौं बहनी तक थःगु पार्टी पाखें सरकारय् ब्वति काइपिनि नां लःल्हाइगु जूगु दु । सद्भावनां धासां थःगु पार्टीयात निगू मन्त्रालय बीमाःगु माग याःगु दु । यदि मबील धासाः थःगु पार्टी सरकारं पिने हे च्वनीगु ख्याच्वः ब्यूगु दु ।
