'उपरथी पदय् सहमति मजूसा शान्ति प्रक्रिया अवरूद्ध'
एनेकपा (माओवादी) जनसेनाया प्रवक्ता चन्द्रप्रकाश खनालं 'बलदेवं' समायोजनय् वनीगु जनसेनायात उपरथीया पद मदुसा जनसेना समायोजनय् मवनेगु व अवकाश ल्यःपिंत नं बिदा यायेमफइगु खँ धयादीगु दु । सेना समायोजन याइगु इलय् माओवादी जनसेनायात उपरथीतकया दर्जा बिइमाःगु धयादिसें बलदेवलं थःथे मजूसा व्यक्तिगत योग्यताया आधारय् समायोजन जुइमफइगु ठोकुवा यानादिल ।
आइतवाः येँय् जूगु छगू ज्याझ्वलय् बलदेवं समायोजन ल्ययाकाःपिं मध्ये स्वद्वः व निसः जनसेनायात आर्थिक प्याकेज बिइमाःगु माग नं यानादीगु दु । समायोजनया निंतिं तोकेयाःगु ल्याः खुद्वः व न्यासः बाहेक अप्वः जूपिं जनसेनायात प्याकेज बिइमाःगु मखूसाः कार्यान्वयय् प्रश्न वइगु ख्याच्वः तकं वय्कलं बियादिल ।
वय्कलं थप क्षतिपूर्ति वा आर्थिक प्याकेज, उपरथी थुज्याःगु विषयलय खँ मिलेमजूतल्ले शान्ति प्रक्रिया अवरुद्ध जुयाच्वनीगु धयादिल ।
