पुलांपि लडाकुत नाप निगू बुँदे सम्झौता / आन्दोलया ज्याझ्वः लितकाल
सरकारनाप निगू बुँदे सम्झौता जुइवं पुलांपि लडाकुतय्सं नेपाल बन्द लगायत फुक्कं आन्दोलनया ज्याझ्वः लितकाःगु दु ।
लडाकुत नाप बिहीवाः शान्ति मन्त्रलायय् जूगु वार्ताय् प्रहरी नियन्त्रणय् दुपिं लडाकुतय् विवरण बिइगु व एकमुष्ट आर्थिक प्याकेजया खाकाया विवरण मेगू वार्ता न्ह्यः मन्त्रालययात लःल्हायेु सहमति जूगु दु । निगूलिं विवरण पेश यायेधुंकाः हानं थ्वहे हप्ताय् निगू पक्ष दथुइ वार्ता यायेगु सहमति नं जूगु दु ।
वार्ताय् सरकारपाखें शान्ति मन्त्री सत्या पहाडी नेतृत्वया पुचः व लडाकुतपाखें सागर लिम्बु सहित स्वम्हेसिया पुचःया ब्वति दुगु खः । लडाकुतय्सं थःपिंत बियातःगु अयोग्यया बिल्ला लितकायेमाःगु, बहिर्गमनय् लाःपिं लडाकुतय् दीर्घकालीन व्यवस्थापनया निंतिं एकमुष्ट आर्थिक प्याकेजया ज्याझ्वः हयेमाःगु लगायत माग तयाः आन्दोलनय् कुहांवःगु खः ।
