पुलांपि लडाकुतय्त वार्ता वयेत सरकारया आव्हान / बन्द लितकायेत इनाप
सरकारं पुलांपि लडाकुतय्त शान्तिपूर्ण वार्ताय् वयेत आव्हान याःगु दु । शान्ति नापं पुनःनिर्माण मन्त्री सत्या पहाडीं बुधवाः छगू विज्ञप्ति पिथनादिसें पुलांपि लडाकुतय्त बिहीवाः बन्दया ज्याझ्वः लितकायेत इनाप यासें वार्ताय् वयेत इनाप यानादीगु खः ।
विज्ञप्तिइ मन्त्री पहाडीं न्हापा जूगु सम्झौता कार्यान्वन यायेत सम्बन्धित निकाययात पौ छ्वयेधुंकूगु न्ह्यथंसें छुं नं समस्याया शान्तिपूर्ण समाधान वार्ताया माध्यमं पिकाय् फइगु खँ धयातःगु दु ।
लडाकुतय्सं थःपिंत बियातःगु अयोग्यया बिल्ला खारेज यायेमाःगु, लडाकु पुनःस्थापनाया निंतिं वःगु ध्याबा पारदर्शी जुइमाःगु लगायत माग तयाः बिहीवाः नेपाल बन्दया आव्हान याःगु खः । बन्दया पूर्व सन्ध्याय् बुधवाः सनिलय् येँ नापं देय्या थीथी थासं लडाकुतय्सं मसाल जुलुस पिथंगु खः ।
