सरकारय् कांग्रेसया नेतृत्व सुजातां याइगु
एमाले नेतृत्वय् गठन जूगु सरकारय् कांग्रेसया पाखें सभापति गिरिजाप्रसाद कोइरालाया म्ह्यय् सुजाता कोइरालां याइगु जूगु दु ।
मंगलवाः सभापति कोइराला निवास महाराजगंजय् एमाले नेतात नापया सहलय्लय् सभापति कोइरालां थःम्ह्यय् सुजतां कांग्रेसया नेतृत्व यानाः सरकारय् वनीगु खँ धयादीगु खः । प्रधानमन्त्री माधवकुमार नेपाल, एमाले अध्यक्ष झलनाथ खनाल लगायत एमालेया शीर्ष नेतातय् दथुइ जूगु सहलहलय् वयेकलं सुजाता कोइरालायात परराष्ट्र मन्त्रीया जिम्मेवारी बिया बुधवाः हे मन्त्रीमण्डलयात पूर्ण रुप बीत नं एमालेया नेतातय्त इनाप यानादिल । अथेहे कोइरालां उप-प्रधानमन्त्री सुयातं मबीत नं इनाप यानादिल ।
कोइरालाया थ्व निर्णयलय् कांग्रेसया वरिष्ठ नेता शेरबहादुर देउवा, कार्यवहाक सभापति सुशील कोइराला, उपसभापति रामचन्द्र पौडेल, महामन्त्री विमलेन्द्र निधि लगायत नेतातय्सं असहमति प्वंकूसे कोइराला निवासं पिहांवंगु खः ।
कोइराला निवासं पिहांवनेगु झ्वलय् असन्तुष्ट नेता एवंम कांग्रेस उपसभापति रामचन्द्र पौडेलं बैठकय् सुजाता कोइरालाया नां बारे सहलह मजूगु धासें पार्टीइ विचारधीन खँय् थम्हं छुं नं धायेमखु धयादिल । अथेहे महामन्त्री विमलेन्द्र निधिं कांग्रेसया भागय् न्ह्यगू मन्त्रालय् लासां थुकीया बारे बैठकय् सहलह जुइ मफुगु प्रतिक्रिया बियादिल ।
