'राष्ट्रहितयात केन्द्रय् तयाः सुरक्षा नीति'
संविधानसभा बैठकय् थीथी दलया सभासदय्सं न्हूगु संविधानय् राष्ट्रहितयात राष्ट्रया मू नीतिया रुपय् व्याख्य यायेमाःगु खँ बः ब्युगु दु ।
मंगलवाः च्वंगु संविभानसभाया बैठकय् राष्ट्रिय हितया संरक्षण समितिया प्रतिव्रदय् सहलह यायेगु झ्वलय् सभासदतय्सं थ्व बीचा: प्वंकूगु खः ।
बैठकय् माओवादीया सभासद् वर्षमान पुन 'अनन्तं' सार्वभौम देयया सार्वभौमसत्ता व भौगोलिक अखण्डताया रक्षा यायेगु हे राष्ट्रहितया परिभाषा खः धयादिल । वयेकलं संविधान निर्माणया झ्वलय् थीथी राजनीतिक आस्था तइपिं दलतय्सं नं सहमति कायम यानाः मिलन विन्दु मालेमाः धयादिल । वयेकलं जनआन्दोलनया एजेण्डा व संविधानसभायात जनतां ब्यूगु सुभावया आधारय् संविधान निर्माण यायेगु खँय् बः बियादिल ।
नेपाली कांग्रेसया सभासद् दीपकुमार उपाध्यायं राष्ट्रिय हितयात व्यक्तिगत व राजनीतिक स्वार्थ स्वयां च्वये तयाः व्याख्या यायेमाः धयादिल । वयेकलं नेपालय् छुं नं सरकारं पूर्ण कार्यकाल तक च्वने मफूगुया कारण मालेमाःगु खँ धयादिल ।
अथेहे, बैठकय् एमालेया सभासद् अग्नी खरेलं न्हूगु संविधान जारी यायेगु ई तक जनसेनाया समायोजन जुइधुंकीगुलिं संविधानय् जनसेना धइगु खँग्वः न्ह्यथंने म्वाःगु सुझाव बियादिल । वयेकलं देय्यात आवश्यक जूगु ईलय् ग्वहालि यायेगु कर्तव्य दक्वसिंया जुसां झिंच्यादँ दुपिं नागरिकतय्त सैनिक तालिम बी म्वाः धयादिल ।
मधेशी जनअधिकार फोरमया राजलाल यादवं झिंच्यादँ दुपिं दक्वं नागरिकतय्त सैनिक तालिम बीगु व्यवस्थां नागरिकतय् मौलिक अधिकार उल्लंघन जुइगु धयादिल । नापं वयेकलं नेपाली सेना समानुपातिक व समावेशी मजूगुलिं राष्ट्रिय स्वरुपया सेना देयेके माःगु सुझाव बियादिल ।
