मंकाः ज्याझ्वःयात कन्ह्य अन्तिम रुप बीगु

मंगलवाः च्वंगु नीनिगू दलया बैठकं मंकाः न्युनतम ज्याझ्वःया बारे सुझाव कन्ह्य सुथय् तकया दुने बीमाःगु निर्णय याःगु दु ।

मंगलवाः प्रधानमन्त्रीया ज्याकू सिंहदरवारय् जूगु नीनिगू दलया बैठकय् दक्व दलयात मंकाः न्युनतम ज्याझ्वः अध्यन यायेत इनाब्यूगु खः । मंकाः न्युनतम ज्याझ्वः तयार यायेत गठन या:गु कार्यदल‌ं थौं सुथय् मंकाः न्युनतम ज्याझ्वः तयार या:गु ख: ।

थौं च्वंगु नीनिगू दलया बैठकय् चीधंगु दलतय्सं संविधानय् स्थानीय निकाय गठनया व्यवस्था यानाः चीचीधंगु दलयात नं ब्वति याकेत इनाप याःगु दु । अथेहे, थौंया बैठकय् माओवादीं यानाच्वंगु सदन अवरुद्धया बारे माओवादी नाप सहलह यानाः हिउँदे अधिवेशन याकनं क्वचायेकाः न्हूगु अधिवेशन शुरु यायेमाःगु खँय् बैठकय् ब्वतिकापिं नेतातय्सं बः ब्यूगु खः ।