स्वास्थ्य सचिवया राजीनामा स्वीकृत / सुनारया छेँजःयात झिगू लख
मन्त्रिपरिषदया मुँज्यां स्वास्थ्य व जनसंख्या मन्त्रालयया सचिव सुधा शर्मां बिउगु राजनीमा स्वीकृत याःगु दु । मन्त्रिपरिषदया मंगलवाः च्वंगु मुँज्यां शर्माया राजीनामा स्वीकृत याःगु खः । मुँज्यां परराष्ट्र मामिला अध्ययन प्रतिष्ठानया कार्यकारी निर्देशकय् उषाजंग थापाया नं राजीनामा स्वीकृत याःगु दु ।
सरकारं मसिंर २४ गते कालिकोटय् भुतु थिउगु धासें स्याःम्ह मानवीर सुनारया छेँजःयात झिगू लख बिइगु व स्याःपिंत छुवाछुत थःज्याःगु जघन्य अपराध अन्तर्गत कारवाही यायेगु व उकीया अनुगमन यायेगु निंतिं प्रधानमन्त्री ज्याकूया मार्फत संयन्त्र नीस्वनेगु निर्णय याःगु दु ।
अथेहे मन्त्रिपरिषदया मुँज्यां नेपाल पत्रकार महासंघयात केन्द्रीय ज्याकू निर्माण यायेत छगू करोड बिइगु निर्णय याःगु दुसाः कारागारया आधुनिक व्यवस्थापनया निंतिं माओवादी सभासद् देवी खड्काया अध्यक्षताय् छगू समिति नीस्वंगु दु ।
मुँज्यां कर्मचारी सञ्चयकोषया प्रशासक रमेश कुमार भट्टराई व नेपाल रेल्वे कम्पनीया कार्यकारी निर्देशक सुरेशकुमार यादवयात अवकाश बिउगु दुसाः शितलहर पाखें सीपिंनि छेँजःयात राहत स्वरुप नीन्याद्वः बिइगु निर्णय नं याःगु दु ।
