श्रम सम्झौता जूगु देय्या भिसा शुल्कय् अनुगमन याइगु
नेपालनाप श्रम सम्झौता जूगु देशय् ज्या यायेत वनीपिं नेपाःया ज्याकःमितय्तय्त निशुल्क भिसाया व्यवस्था दुसां नं प्रशासनया अनुगमनया कमजोरीया हुनिं थनया थीथी म्यान पावरतय्सं भिसा शुल्क कायेगु यानाच्वंगु दु । अज्याःगु हे समस्या अप्व जुइवं भिसा शुल्क सम्बन्धी व्यवस्था कडाइ यानाः शुल्क कायेकेमबिइगु व गैर कानुनी रूपं भिसा शुल्क कयाच्वंगु कम्पनीत खारेज यायेगु प्रक्रिया सरकारं न्ह्याकूगु दु ।
श्रम व यातायात व्यवस्था मन्त्री सरिता गिरीं गैरकानूनी कथं म्यानपावरतय्सं निशुल्क भिसाय् नं शुल्क कयाच्वगु व उकीयात तत्काल खारेज यानाः दोषीयात कारवाही यायेगु ख्याच्वः बियादीगु दु । गिरीं यक्व देशं निशुल्क भिसा छ्वयाहयेगु यानाच्वंगु जूसां नेपाःमितय्सं धेबा पुलाच्वंगु धयादिसें थुकीया बारे थःम्हं अध्ययन यानाच्वनागु धयादिल ।
वय्कलं श्रम मन्त्रालयया सहसचिव विष्णुबहादुर खड्काया संयोजकत्वय् छगू अनुगमन समिति नापं नीस्वनेधुंकूगु जानकारी बियादिल । अथेहे वैदेशिक रोजगारी बोर्डया कोष दुरुपयोगयात नं नियन्त्रण यायेगु व वैदेशिक रोजगारीइ गैरकानूनी कथं वनाच्वंपिं नेपाःमितय्त संरक्षणया निंतिं प्रक्रिया न्ह्याकेगु धयादिल ।
