अवरूद्ध शान्ति प्रक्रिया याकन सुचारू यायेगु सहमति
छुं ई न्ह्यःनिसें अवरुद्ध जुयाच्वंगु शान्ति प्रक्रिया हाकनं न्ह्यने न्ह्याकेत प्रमुख स्वंगू दलया शीर्ष नेतात दथुइ सहमति जूगु दु ।
प्रधानमन्त्री निवास सिंहदरवारय् च्वंगु प्रमुख दलया शीर्ष नेतातय् मुँज्या याकन हे दिनाच्वंगु शान्ति प्रक्रिया न्ह्याकेगु सहमति याःगु खः । मुँज्याय् प्रतिपक्षी दलतय्सं माओवादीं शान्ति प्रक्रिया पूवंकेत याःगु प्रतिवद्धतता कार्यान्वयन मयागु धासें कुंखिंउगु खः ।
अथेहे मुँज्याय् संसदय् बिचाराधिन अवस्थाय् दुगु सत्य निरुपण लिसे मेलमिलाप आयोग व बेपत्ता खोजबीन सम्वन्धि विधेयकया विषयलय् सहलह यानाः याकनं पारित यायेगु नं सहमति जूगु दु ।
मुँज्याय् प्रधानमन्त्री डा. बाबुराम भट्टराई, माओवादी नायः पुष्पकमल दाहाल 'प्रचण्ड', कांग्रेस सभापति शुसील कोइराला, एमाले नायः झलनाथ खनाल लगायतया नेतातय्गु ब्वति दुगु खः ।
