स्वनिगःया शहर व्यवस्थापन याकनं यायेत प्रमया निर्देशन
प्रधानमन्त्री डा. बाबुराम भट्टराईं स्वनिगःया शहर व्यवस्थापन यायेगु ज्या याकनं न्ह्याकेत सम्बन्धित निकायया पदाधिकारीतय्त निर्देशन बियादीगु दु ।
स्वनिगःया शहर व्यवस्थापनया सम्बन्धय् प्रधानमन्त्री ज्याकू सिंहदरवारय् थीथी निकायया प्रमुख व प्रतिनिधिलिसे सोमवाः जूगु सहलहसं राजधानीयात व्यवस्थित शहरया रुपय् विकास यायेत प्रधानमन्त्रीं उगु निर्देशन बियादीगु खः । स्वनिगःया यातायात, टेलिफोन, खानेपानी, विद्युत थेंज्याःगु अत्यावश्यक सेवाय् सुधार हयेत नं प्रधानमन्त्री डा. भट्टराईं निर्देशन बियादीगु जानकारी भौतिक योजना लिसे निर्माणमन्त्री हृदयेश त्रिपाठीं पत्रकारतय्त बियादिल ।
मन्त्री त्रिपाठीं सार्वजनिक थासय् दयेकाः तःगु भवन नापं खुसि लिक्क विशेष यानाः बागमती खुसि सिथय् जूगु अव्यवस्थित बसोबासया सम्बन्धय् अध्ययन यानाः उकियात व्यवस्थित यायेगु विषयलय् सहलह जूगु धयादिल ।
शहरया पार्किङ व्यवस्थित यायेगु व वइगु सार्क सम्मेलनयात दृष्टिगत यानाः येँया सतक तब्याः यायेत, राजधानीया सुरक्षा व्यवस्था लगायतया विषयलय् नं सहलह जूगु जानकारी वय्कलं बियादिल ।
सहलहसं येँ महानगरपालिका, नेपाल विद्युत प्राधिकरण, नेपाल टेलिकम व महानगरीय ट्राफिक प्रहरी ज्याकूया पदाधिकारीपिनिगु ब्वति दुगु खः ।
