न्हूगु संविधानय् मिसा अधिकार बारेया सुझाव तयार
महिला मानव अधिकार रक्षक सञ्जालं न्हूगु संविधानय् पैतृक सम्पत्तिइ काय् व म्ह्याय्या समान हकया विषय मौलिक हकय् तयेमाःगु लगायतया सुझाव तयार याःगु दु । सञ्जालया क्षेत्रीय प्रतिनिधिलिसे याःगु सहलहया आधारय् उगु सुझाव तयार याःगु सञ्चालया सचिवालय दुजः महिला पुनःस्थापना केन्द्र (ओरेक नेपालं) जानकारी बिउगु दु ।
न्हूगु संविधानय् अंश व वंशय् मिसात मिजं सरह व नागरिकताय् मिसा व मिजंया समान हक, प्रत्यक्ष निर्वाचन प्रणालीइ मिसाया निंतिं ब्यागलं क्षेत्र क्वःछिइगु लिसे राज्यया हरेक निकायलय् जनसंख्याया आधारय् मिसाया समानुपातिक ब्वति, सारभूत सिद्धान्तया आधारय् समावेशीताया प्रावधान तयेमाःगु बुँदा सुझावय् तयातःगु दु ।
अथेहे, प्राकृतिक श्रोत लिसे साधनया उपयोगय् मिसाया न्हापांगु अधिकार सुनिश्चितता, हरेक आयोगय् म्होतिं न्याम्ह दुजः व मिसाया समानुपातिक ब्वति, शोषण विरुद्धया हकय् मिसा हिंसा अन्त्य, राजनीतिक दलया फुक्क निकायलय् मिसाया समानुपातिक ब्वति, प्रजनन् स्वास्थ्यय् मिसाया हक, लैङ्गिक पूर्वाग्राही खँग्वः छ्यलेमदइगु (गथेकि – राष्ट्रपति, सभापति), राज्य पुनर्संरचना व शासकीय स्वरुपय् मिसाया समानुपातिक ब्वति, अपाङ्गता जूपिं व्यक्तिया अधिकारया निंतिं मौलिक हकय् हे ब्यागलं धाराया व्यवस्था यायेमाःगु सुझाव नं तयार याःगु ओरेकया ज्याझ्वः संयोजक कला राईं जानकारी बियादिल । उगु सुझाव याकनं हे संविधानसभा दथुइ लःल्हाइगु ज्याझ्वः दु ।
