नेपाःया हे दकलय् तज्जाःगु हनुमानया मूर्ति !
कृष्णनगरय् दयेकूगु हनुमानया मूर्ति नेपाःया हे दकलय् तःजाम्ह जूगु दाबी याःगु दु । निर्माणकर्ता नारदास बाबां उगु मूर्ति नेपाःया हे तज्जाःगु हनुमानया मूर्ति जूगु दाबी याःगु खः । कृष्णनगर गाविस – ७ शिव त्वालय् दयेकूगु उगु मूर्ति स्वीगुंगू फिट तज्जाःगु व झिंच्यागू फिट ब्याः दु । गेरु रङ्गया उगु मूर्तिया छातीइ राम व सीताया मूर्ति नापं दयेकूगु दु ।
बाबा नारदासं नेपाः व भारतया थीथी गामय् चाःहिला थःम्हं मूर्तिया निंतिं चन्दा संकलन याःगु जानकारी बियादिल । मूर्ति दयेकेत च्यागू लख स्वयाः आपाः खर्च जुइधुंकूगु मूर्ति निर्माण समितिं जानकारी बिउगु दु ।
स्थानीय कालीगढ लिसे भारतया मुङ्गेरीलालं उगु मूर्ति दयेकूगु खः । च्यादँ न्ह्यःनिसें तीर्थाटनया निंतिं भारतया श्रीनगर वंगु इलय् अनया तज्जाःगु हनुमानया मूर्ति खनेवं थःम्हं अज्याःगु हे मूर्ति दयेकेगु संकल्प काःकथं थौंकन्हय् उगु मूर्ति पलिस्था जूगु बाबां धयादिल ।
भक्तजनतय्त अःपुइकेगु निंतिं भीमकाय मूर्ति क्वय् हनुमानया मेम्ह चिधिकःम्ह मूर्ति नापं दयेकूगु दु । हनुमान शक्तिशाली, निडर व विश्वासिलो जूगुलिं उकियापाखें प्रेरणा कायेमाःगु बाबा शेषमनया धापू दु ।
