नेवाःतय् बन्दं बिउगु सन्देश कायेमाल
नेपालमण्डलया नेवाः जातिं म्हिगः याःगु नेपालमण्डल बन्दं छु सन्देश बिल देय्या सम्पूर्ण राजनीतिक पार्टीतय्सं थुइकल हे जुइमाः । नेवाःतय् आदिभूमि जुयाच्वंगु स्वनिगः ला आः तक थुलि ठप्प जुइक गबलें हे बन्द मजूनि । उकिया नापनापं म्हिगःया बन्दं आः तक किटान याये मफयाच्वंगु स्वनिगः जःखःया भ्वँत, धौख्यः, पन्ति, बाह्रबिसे, दोल्खा, त्रिशुली, पालुङ, टिष्टुङ समेत बन्द जुयाः आः तक किटान याये मफयाच्वंगु नेपालमण्डल लागाया नक्शा कीगु ज्या समेत याना बिउगु दु । म्हिगः जूगु बन्दं याःगु थ्व छगू मेगु उपलब्धीमूलक ज्या खः । नेपालमण्डल लागाया नक्सा कीबलय् गुगु लागाया नेवाःतय्सं थःिपंत नेपालमण्डलया नागरिक तायेकीगु खः उकिया स्पष्ट अभिमत बीगु ज्या म्हिगःया बन्दं याःगु दु । आः संघीय व्यवस्थाया प्रदेश निर्माण याइबलय् नेवाः लागाया नक्शा कीत यक्व हद तक ग्वाहालि हे जुइगु जूगु दु ।
मेखे नेवाःतय्सं याःगु नेपालमण्डल बन्दया इलय् न्हापा लिपा गबलें मजूनि कथं छथ्वः मनूत प्रतिकारय् नं कुहां वःगु खनेदत । राजनीतिक पार्टी व उमि भ्रातृ संगठनतय्सं नेवाःतय् स्वनिगः बन्द याइबलय् गबलें नं थथे प्रतिकार जूगु झीसं मसिउ । आः नेवाःतय्सं नेवाः लागा बन्द याःगुलिं प्रतिकारया आँट जुल । थुकियात नेवाःतय्सं चीधंगु घटनाया रुपय् काये मजिउ ।
म्हिगःया बन्द नेवाःतय्सं थःगु अधिकार प्राप्तीया लागिं दवाव बीत याःगु बन्द खः । थ्व सरकारया विरोधय् याःगु बन्द मखु । उकिं थुकियात देय् प्रति गम्भीर फुक्क हे राजनीतिक पार्टी व मेपिं सरोकारवालातय्सं अर्थपूर्ण रुपं ग्रहण यायेमाःगु आवश्यकता दु ।
(किपा - उदेन न्हूसाय्मि)
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
