मालपोतया कर्मचारी व दलालया मिलेमतोय् जग्गा नामसारी
येँया कोटेश्वर ३५ वडाय् च्वंगु करोडौं मू तूगु जग्गा मालपोतया कर्मचारी व जग्गा दलालया मिलेमतोय् नक्कली नाता प्रमाण तयार यानाः मेपिनिगु हे नामय् नामसारी याःगु दु ।
मोतीमाया व्यञ्जनकारया नामय् दुगु कोटेश्वर वडा नं. ३५ या कित्ता नं. ७३६५ या झिंछगू आना, कित्ता नं. ३६९ या छगू रोपनी व छगू आना, ७ क या न्यागू आना व २ पैसा व वडा नम्बर ८ ख १८१ या झिगू आना जग्गा दलाल श्याम व्यञ्जनकार व नक्कली नाता तयार याःम्ह सागर व्यञ्जनकार, कमला व्यञ्जनकार व मालपोतया कर्मचारीतय्गु मिलेमतोय् जग्गाधनीया तताःया काय् सानुकाजी व्यञ्जनकारयात पास याःगु हकवालातय्सं दाबी याःगु दु ।
थौं येँय् पत्रकार सम्मेलन यानाः पीडित रत्नबहादुर व्यञ्जनकारं थः तरमां मदयेधुंकाः सीम्हय्सिया काय् – म्ह्याय्पिं सु नं मदुगु अवस्थाय् तरमांया नामय् दुगु जग्गा स्वतह थःगु नामय् नामसारी जुइमाःगुलिइ तत्कालीन वडाध्यक्ष व मालपोतया कर्मचारीया मिलेमतोय् नाता प्रमाण व मृत्युदर्ता नक्कली दयेकाः नाता हे मदुम्ह सानुकाजी व्यञ्जनकारयात नामसारी यानाः थःत जग्गाविहीन याःगु दाबी याःगु दु ।
वय्कलं आः वहे सानुकाजीया जहान व जग्गा दलाल श्याम व्यञ्जनकारया पुचलं मालपोतया हे कर्मचारीत लिसे मिलय् जुयाः उगु जग्गा राजेन्द्रप्रसाद फुयाँल, दिलिपकुमार न्यौपाने व कृष्णप्रसाद सुवालयात मिउगु जानकारी बियादीगु दु ।
पीडित रत्नबहादुरं थौंकन्हय् अख्तियारं उगु हे जग्गा भोग चलनपाखें रोक्का यानाः मिउगु जग्गाया विषयसं मालपोल ज्याकूयात छानबिनया निंतिं पौ च्वयाः नं मालपोत ज्याकू डिल्ली बजारं मिसिल लुयाःमवः धकाः दुःख बियाच्वंगु कनादिल ।
