माओवादी केन्द्रीय मुँज्या सोमवाः तकया निंतिं स्थगित
थनिंनिसें एकीकृत नेकपा (माओवादी)या केन्द्रीय समितिया मुँज्या न्ह्याःगु दु । ताः ई लिपा शनिवाः च्वंगु माओवादी केन्द्रीय मुँज्या नं छुं ई च्वनाः सोमवाः तकया निंतिं स्थगित जूगु दु ।
शनिवाःया मुँज्याय् पार्टी नायः पुष्पकमल दाहाल 'प्रचण्डं' थःगु राजनीतिक प्रतिवेदन न्ह्यब्वयादीगु खः । प्रतिवेदनय् पार्टीया आधिकारिक लाइन शान्ति व संविधान जूगुलिं उकी हे पार्टी छप्पँ जुइमाःगु व उकीया निंतिं जनपरिचालनया ज्याझ्वः यायेमाःगु खँ न्ह्यथनातःगु दु । अथेहे पार्टी दुनेया अन्तरविरोधया खँ महाधिवेशनपाखें निर्णय यायेगु नं प्रचण्डया प्रतिवेदनय् न्ह्यथनातःगु दु ।
पार्टी न्वुक मोहन वैद्यं धाःसा प्रचण्डया प्रतिवेदन प्रति असहमति प्वंकूसें फरक मत तयेगु तयारी यानाच्वंगु दु । मुँज्या लिपा पार्टी प्रवक्ता दिनानाथ शर्मां वैद्यं नायःया प्रतिवेदन अध्ययन यानाः लिखित रुपं थःगु मत तइगु जानकारी बियादिल ।
