'खुल्ला प्रतिस्पर्धापाखें हे सेनाय् मधेसी भर्ना'
नेपाली सेनाय् मधेसी भर्ना खुल्ला प्रतिस्पर्धापाखें हे याइगु रक्षा मन्त्रालयं स्पष्ट याःगु दु । रक्षा मन्त्रालयं शुक्रवाः छगू पत्रकार सम्मेलन यानाः यानाः सेनाय् मधेसीतय् भर्ना कानुन बमोजिम हे जुइगु जानकारी बिउगु खः ।
पत्रकार सम्मेलनय् रक्षा मन्त्रालयया नं जिम्मेवारी कःघाना च्वनादीम्ह उपप्रधानमन्त्री विजयकुमार गच्छदारं "नेपाली सेनाय् समावेशी यायेगु सम्बन्धी नीति पत्र" सार्वजनिक यानादिल । वय्कलं सेनाय् मधेसीया सामूहिक प्रवेश मजुइगु स्पष्ट यानादिसें आरक्षण नीति कथं खुल्ला प्रतिस्पर्धापाखें हे जुइगु धयादिल ।
मन्त्रिपरिषद्या वंगु मंगलवाः च्वंगु बैठकं स्वद्वः मधेसीयात नेपाली सेनाय् भर्ना यायेगु निर्णय याःगु ख । सहमति जूगु निर्णयया "माइन्युट" नं रक्षा मन्त्रालयं पत्रकार सम्मेलनय् सार्वजनिक यात । माइन्युट कथं सेनाय् स्वद्वःया दरबन्दीइ मधेसी, मधेसी मूलया आदिवासी, दलित व मुस्लिमतय्त भर्ना यायेगु जानकारी पत्रकार सम्मेलनय् बिउगु खः ।
रक्षा सचिव नवीन घिमिरें स्वद्वः दरबन्दीया निंतिं हिमालय् स्वंगू, पहाडय् न्यागू व मधेसया च्यागू थासय् भर्ना चायेकेगु जानकारी बियादिल । थुकथं हे मधेसया ऐतिहासिक थासं सेनाया बटालियन दयेकीगु नं रक्षां जानकारी बिउगु दु ।
थ्वहे दथुइ मधेसी युवातय्त नेपाली सेनाय् समूहगत प्रवेश याकेगु सरकारी निर्णय विरुद्ध शुक्रवाः सर्वोच्चय् छगू रिट लाःगु दु । नेपाली सेनाय् समावेशी यायेगु सम्बन्धी नीति पौ खारेजीया माग यासें चुरे भावर राष्ट्रिय एकता पार्टीं सर्वोच्च अदालतय् रिट दायर याःगु खः ।
मन्त्रिपरिषद्या निर्णय कथं छु नं जात विशेषयात सेनाय् सामूहिक प्रवेश याकेवलय् मेगू जात-जातिया संविधान प्रदत्त समान अधिकारया हक कुण्ठित जुइगु दावी लिसे नीति पौ खारेजीया माग याना रिट दायर याःगु उगु पार्टीया सभासद बद्री न्यौपानें जानकारी बियादिल ।
