सर्वदलीय संयन्त्र खारेज यायेत अख्तियारया निर्देशन
स्थानीय निकायया ज्या न्ह्याकेगु निंतिं दयेकूगु सर्वदलीय संयन्त्र खारेज यायेत अख्तियार दुरुपयोग अनुसन्धान आयोगं निर्देशन बिउगु दु ।
संयन्त्रपाखें विनियोजन याःगु धेबाय् व्यापक भ्रष्टाचार जूगु दाबि यासें अख्तियारं अज्याःगु निर्देशन बिउगु खः । सर्वदलीय संयन्त्र गैरकानुनी जूगु धासें अख्तियारं उपभोक्ता समितिपाखें स्थानीय निकाय सञ्चालन यायेत स्थानीय विकास मन्त्रालययात निर्देशन बिउगु खः ।
अख्तियारं स्थानीय निकायया विकास निर्माण यायेगु ज्याय् समन्वय यायेत दयेकूगु मौजुदा संयन्त्रया ज्या, कर्तव्य व अधिकार, जिम्मेवारी व उत्तर दायित्व छु खः धइगु प्रष्ट आधार नापं खनेमदुगु धासें सर्वदलिय संयन्त्रयात हे गैर कानुनी दावी याःगु दु ।
अख्तियारं संविधान लिसे प्रचलित कानुनया अःख जुइकथं संयन्त्र दयेकूगु दावी याःगु दु । अख्तियारं कानुनी व्यवस्था पूमवंकुसे दयेकूगु फुक्क सर्वदलीय संयन्त्रयात याकनं खारेज यायेत स्थानीय विकास मन्त्रालययात निर्देशन बिउगु दु ।
अथेहे अख्तियारं मापदण्डलिसेया उपभोक्ता समिति नीस्वना झिंन्यान्हुया दुने लागू यायेत नं निर्देशन बिउगु दु । उकी समावेशी लिसे राजनीतिक दलय् आवद्द मजूगु तटस्थ मनूतय्त समितिइ तयेत सुझाव नापं बिउगु दु ।
स्थानीय निकाय सञ्चालनया निंतिं २०६६ साल असार २५ गतेया मन्त्रिपरिषद्या बैठकं सर्वदलीय संयन्त्र नीस्वनेगु निर्णय याःगु खः ।
