सुनारयात सहिद घोषणा यायेत माग / सहिद घोषणा मयासाः संसद न्ह्याके मबीगु
प्रमुख राजनीतिक दलया दलित सभासद्तय्सं कालिकोटय् भुतु थिउगु हे कारणं सीम्ह मनवीर सुनारयात सहिद घोषणा मयातल्ले संसद न्ह्याके मबिइगु ख्याच्वः बिउगु दु ।
शुक्रवाः येँ ग्वसाःग्वःगु छगू साक्षात्कारय् दलित नेतातय्सं सुनार हत्याकाण्डया दोषियात कारबाही, राष्ट्रिय सहिद घोषणा, झिगू लख तका क्षतिपूर्ति, सुनारया छेँजःयात भरणपोषण व शिक्षाया व्यवस्था मयातल्ले संसद न्ह्याके मबिइगु व देय्न्यंक सतक आन्दोलन यायेगु ख्याच्वः बिउगु दु ।
नेकपा (एमाले)या सभासद् छविलाल विश्वकर्मां दलितया मर्यादा, धैर्यता व शिष्टतायात कमजोर तायेकूगु धयादिसें थःपिंसं ल्ह्वनाःगु माग पुमवंतल्ले संसद् न्ह्याके मबिइगु धयादिल । विश्वकर्मां पुस १ गते हे सभामुखं दलित हत्याया विषयसं सरकारयात लिसः बिइत रूलिङ याःसां नं सरकारं वेवास्ता याःगु द्वपं बियादिल ।
एनेकपा (माओवादी)या सभासद् पद्मलाल विश्वकर्मां दलित हत्याया विषयसं गृहमन्त्री व प्रधानमन्त्रीं संसदय् लिसः बिइमाःगु माग यानादिल । वय्कलं तत्काल थःपिनिगु माग पूमवंकुसा वर्तमान सरकार दलित विरोधी सरकारय् प्रमाणित जुइगु धयादिल ।
नेपाली कांग्रेसया सभासद लक्ष्मी परियारं दलित हत्या अन्तरिम संविधान, छुवाछुत मुक्त राष्ट्र घोषणा व छुवाछुत विरुद्धया ऐन विरोधी जूगु धयादिसें हत्याया द्वपं लाःपिंत सजाँय, सुनारया छेँजःयात क्षतिपूर्ति व सहिद घोषणा मयासाः आन्दोलन न्ह्याकेगु धयादिल ।
कालिकोटया जुविधा-४या छगु होटलय् चुरोटट च्याकेगु झ्वलय् भुतु थिउगु धासें स्थानीय मीनबहादुर शाही व दिपक शाहीं सुनारयात दाःया स्याःगु खः ।
