आक्रमण याःवःपिं म्हसिल
येँ / (सन्ध्या टाइम्स) नेवाः राज्य मंकाः संघर्ष समितिपाखें म्हिगः याःगु नेपालमण्डल बन्दय् बन्दकर्तातय्त कुलेश्वरय् आक्रमण याःवःपिंत नेवाः विरोधी ठहर यानाः कारवाही यायेमाःगु माग संघर्ष समितिया किपू कचाया दुजःतय्सं याःगु दु । म्हिगः कुलेश्वरया फलफुल बजाः दुने पसः तिकः वंपिं नेवाः कार्यकर्तातय्त अन च्वंपिं विजय गुप्ता, संजय गुप्ता, रवि व मधु प्रधानं आक्रमण याःगु खः । थुपिं आः बेपत्ता जुयाच्वंगु दुसां आन्दोलनकारीतय्सं थुमित मालाच्वंगु दु । थुमिसं म्हिगः सुनियोजित रुपं हे बन्दकर्तातय्त बजाः दुने सःताः कथि व मेमेगु ल्वाभलं आक्रमण याःगु खः । उकी लानाः बन्दकर्तात सुरेन्द्र महर्जन, संजय तण्डुकार, विजय शाही। नरेन्द्र मानन्धर, मधुकर महर्जन, बसन्त महर्जन, नारायण महर्जन, दिलीपकुमार महर्जन, विनोद महर्जन, धर्म मुनिकार व नरेश महर्जनिपं घाःपाः जूगु खः ।
(किपा - उदेन न्हूसाय्मि)
